Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristóvão

DILI, 26 juñu 2019 (TATOLI)Governu liuhosi reuniaun Konsellu Ministru, rona aprezentasaun Proposta Rezolusaun Governu hosi Ministra Finansa en-ezersísiu, Sara Lobo Brites, kona-ba finansiamentu kontra partida Ró Nakroma 2, entre Governu Timor-Leste no Governu Federál Alemaña hamutuk ho Kompañia Estaleiru Navál “Damen”, ne’ebé foin lais ne’e asina ona.

“Ita atu konfirma fonte ne’ebé ita atu hasai hodi bele tau iha ita-nia kompartilla ba ita-nia kontra partida. Osan Governu Alemaña tau no Governu Timor-Leste mós sei tau,” Ministru Estadu Prezidénsia Konsellu Ministru, Hermenegildo Augusto Cabral Pereira, hateten ba jornalista sira hafoin reuniaun Konsellu Ministru iha Palásiu Governu, kuarta ne’e.

Tuir governante ne’e, Proposta Rezolusaun Governu sei análize no semana oin sei aprezenta fila fali ba Konsellu Ministru atu hetan aprovasaun.

Entretantu, iha loron 31 maiu liu-ba, Governu Timor-Leste reprezenta hosi Ministru Transporte no Komunikasaun, José Agustinho da Silva asina akordu ho Governu Federál Alemaña no Kompañia Estaleiru Navál “Damen” hodi halo konstrusaun ba Ró-Ahi Nakroma 2.

Iha tempu hanesan, seidauk iha alokasaun orsamentu ba verba ne’e iha Orsamentu Jerál Estadu (OJE) 2019, tanba ne’e liuhosi proposta ohin ne’ebé aprezenta atu garante pagamentu finansiamentu hosi parte Timor-Leste.

Projetu ne’e Governu Alemaña kontribui miliaun €7,8 no Timor-Leste sei kontribui miliaun €7,1.

Ró Nakroma 2 ne’e tuir planu sei kontrui iha Xina no sei hala’o operasaun dahuluk iha tinan 2021.

Jornalista: Julia Chatarina

Editór: Xisto Freitas

Notísia relevante: http://www.tatoli.tl/2019/05/governu-tl-ho-alemana-asina-kontratu-ro-nakroma-2/

HAKEREK NO HATÁN

Please enter your comment!
Please enter your name here