Vise Xefe Estadu Maiór Jenerál FALINTIL-Forsa Defeza Timór-Leste (F-FDTL), Brigadeiru Jenerál Falur Rate Laek. Imajen António Gonçalves

DILI, 26 juñu 2019 (TATOLI)–Vise-Xefe Estadu Maiór-Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek hasoru malu ho Prezidente Repúblika (PR), Francisco Guterres Lú Olo, hodi fahe informasaun kona-ba situasaun jerál no atividade operasionál F-FDTL) inklui nomeasaun ba Komandante Komponente sira.

“Ami aborda kona-ba nomeasaun Komandante Komponente sira, para ami bele transfere responsabilidade no bele hala’o atividade operasionál ho di’ak. Kuandu ema ne’ebé iha pozisaun kle’ur liu iha fatin ida sira bele sai otoritáriu no rutina ábitu, tanba ne’e tenke muda”, nia tenik ba jornalista sira hafoin hasoru malu ho Xefe Estadu iha Palásiu Prezidente Nicolau Lobato, Bairru Pité, kuarta ne’e.

“Buat ne’e ema patroniza tiha tinan ba tinan no ita halo tuir de’it tanba ne’e ita-nia esperiénsia mós istória dehan. Tanba ne’e mak ohin ha’u aborda mós kestaun nomeasaun Komandante Komponente ba Prezidente Repúblika,” nia hatutan.

Mandatu ba kargu Komandante Komponente sira ramata ona iha loron 17 novembru 2018 (Dekretu Prezidente Repúblika nian Nú. 46/2016 loron 23 novembru).

Nomeasaun foun ka halo rekondusaun bazeia ba lei nú. 1 no 2 artigu 75 Dekretu-Lei Nú. 28/2016 de 13 jullu, alterasaun dahuluk ba Dekretu Lei Nú 7/2014, 12\marsu (Estatuto dos Militares das F-FDTL) nia haruka.

Iha Dekretu-Lei ne’e haktuir ezersísiu ba kargu Komandante Komponente sira iha durasaun másima tinan rua no halo renovasaun dala-ida de’it.

Inisiativa ne’e mai hosi proposta Governu liuhosi Ministériu Defeza no Seguransa (MDS) hodi hahú halo audisaun no konsulta ho Konsellu Superiór Defeza Militár ne’ebé sei prezide hosi Ministru Defeza no Seguransa rasik.

Hafoin audisaun no konsulta ho Konsellu Superiór Defeza Militár, MDS lori ba Konsellu Ministru hodi hetan aprovasaun. Prosesu ikus, Proposta ne’ebé hetan aprovasaun hosi Governu, hato’o ba Prezidente Repúblika hodi nomea tuir Dekretu Prezidente Repúblika nian no públika iha Jornál Repúblika (Dekretu Governu n.° 6/2016, de 11 maiu Rejimentu Konsellu Superiór Defeza Militár).

Entretantu, Falur esplika, kona-ba kontinuidae mandatu Xefe Estadu Maiór Jenerál, Lere Anan Timur, depende desizaun Governu no Prezidente Repúblika.

“Ne’e depende desizaun polítika. Ha’u la-hatene. Foin lalais mós ami ko’alia asuntu ne’e no ha’u hanoin katak buat hotu depende ba desizaun polítika. Ami iha ne’e hanesan ezekutivu,” Falur informa.

Biban ne’e, Jenerál Falur mós ko’alia kona-ba mudansa pozisaun iha forsa terrestre fronteira iha postu hotu iha territóriu tomak, hahú iha 20 juñu. Enkuantu iha Enklave Oé-Cusse ho Ataúro, hosi parte Komponente Naval mak halo no agora iha ona faze preparasaun nia laran para troka.

Aleinde ne’e, nia haktuir, nia mós halo deskusaun ho Xefe Estadu kona-ba selebrasaun tinan 20 referendu.

“Agora dadauk ami-nia enjeñaria serbisu hela iha Aileu. Prepara forsa hodi halo treinamentu hafoin halo seguransa ba xefe estadu sira (konvidadu) hosi rai li’ur,” Falur haklaken.

 Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here