Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos.

DILI, 26 juñu 2019 (TATOLI)  Projetu Lei Anti Korrupsaun (LAK) ne’ebé iha hela faze diskusaun públiku, mensiona mós artigu ida  atu halakon direitu polítiku ba korruptór sira.

“Iha artigu ida hateten katak kualkér sidadaun, hahú husi Prezidente Repúblika ho kargu xefia sira ne’ebé komete aktu korrupsaun ho pena prizaun tinan tolu to’o lima, sei la hetan direitu polítiku,” informa  Vise Prezidente Komisaun A Parlamentu Nasionál (PN)  ne’ebé trata asuntu Konstitusionál no Justisa, Francisco de Vasconselhos,  ba Ajénsia TATOLI, ohin, iha Parlamentu Nasionál.

Diskusaun públiku ba projetu LAK  tama ona iha kapítulu VI, iha artigu ida ko’alia kona-ba kualkér sidadaun to’o Prezidente Repúblika ne’ebé involve iha korrupsaun ho kastigu tinan tolu to’o lima, sei lakon direitu polítiku.

“Projetu Lei Anti Korrupsaun iha artigu ida ne’e todan tebes tanba ema ne’ebé komete korrupsaun sei labele kandidata-an atu sai deputadu no membru governu,” hateten Deputadu Francisco de Vansconselhos.

Nia salienta katak, entidade balun dehan, artigu ida ne’e implementa iha futuru ne’e di’ak tebes, maibé ema korruptu ona depois tama fali ba partidu ne’e oinsá, nia resposta maka ema ne’e hetan ona kastigu tinan tolu to’o lima sei lakon direitu polítiku.

Iha diskusaun  projetu LAK tama ona iha kapítulu VI, kada kapítulu, balun to’o artigu 15, 18 no 20. Nune’e maka loron ida dalaruma diskute de’it artigu ida ka rua tanba haree husi tékniku no jurídiku ho intensaun atu diskute kle’an inklui liga mós ba lei sira seluk.

Atu implementa projetu LAK iha futuru maka Komisaun Anti Korrupsaun (CAC-sigla portugés), Ministériu Públiku (MP), Polisia Servisu Investigasaun Kriminál (PSIK), nune’e durante ne’e sira inklui hotu iha laran hodi halo diskusaun, sira fó opiniaun liga ba asuntu sira tékniku no jurídiku.

“Ita labele ansi, maibé espetativa públiku hakarak lei tenke forte, fó pena ne’ebé maka’as ba kualkér ema ne’ebé komete krime atu asume nia responsabilidade,” afirma Francisco de Vasconselhos.

“Ita ko’alia kona-ba boa governasaun, ita tenke hahú kedas ho prevensaun depois represaun hafoin promove boa governasaun. Ema barak ko’alia kona-ba prevensaun, maibé tenke sensibiliza ema atu hadook-an husi hahalok sira ne’ebé kontra lei, liuliu sira ne’ebé lori prejuizu ba Estadu”.

Reprezentante povu ne’e husu ba entidade hotu no sidadaun sira atu fó fiar nafatin ba lejislatura da-lima tanba iha kompromisu atu aselera duni projetu LAK ne’e, liuhusi diskusaun ho kle’an atu garante kualidade lei, la’ós ko’alia de’it oinsá atu kastigu ema, maibé oinsá mós hatene ema nia direitu no devér.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here