Ministru Estadu Prezidénsia Konsellu Ministru, Agio Pereira no membru governu seluk, simu Primeiru-Ministru, Taur Matan Ruak, iha Aeruportu Internasionál Prezidente Nicolau Lobato, hafoin fila hikas hosi tratamentu saúde. Imajen Mídia GPM

DILI, 25 juñu 2019 (TATOLI)–Primeiru-Ministru (PM), Taur Matan Ruak, iha tersa ne’e, fila hikas ona mai Timor-Leste, hafoin semana ida halo tratamentu saúde iha Ospitál Mount Elizabeth Singapura, tuir rekomendasaun hosi médiku Ospitál Nasionál Guido Valadares (HGVN-sigla portugues).

Xefe Governu halo viajen iha loron 16 juñu no hetan akompañamentu hosi doutór timoroan na’in rua, Mendes Pinto no infermeiru Abílio Oliveira durante konsulta iha Ospitál Mount Elizabeth.

Tuir Pájina Gabinete Primeiru-Ministru (GPM) ne’ebé Agência Tatoli sita, ohin, katak iha tratamentu saúde ne’e, médiku espesialista halo check up ba fuan, raan no mós estómagu, iha ne’ebé rezultadu hatudu katak Xefe Governu iha kondisaun di’ak no laiha implikasaun negativu ruma.

Iha biban ne’e, Ministru Saúde Interinu, Bonifácio Maucoli dos Reis esplika hosi medical check-up laiha indikasaun ruma ne’ebé hatudu negativu—Xefe Governu nia kondisaun exelente tebes.

“Bainhira   hala’o medical check up iha Ospitál Mount Elizabeth Singapura, deteta uituan mak iha estómagu ne’ebé ho inflamasaun, tanba ita hatene ita-nia primeiru-ministru iha tempu rezisténsia durante tinan 24 konsumu hahán ne’ebé mak ita hatene la kondiz, tanba situasaun funu, tan ne’e iha inflamasaun uituan iha estómagu, maibé la implika  ba nia saúde,” nia dehan iha Aeruportu Internasionál Prezidente Nicolau Lobato, Comoro, ohin.

Maucoli haktuir, médiku espesialista Ospitál Mount Elizabeth fó instrusaun ba PM atu bele konsumu hahán ne’ebé di’ak no labele liu oras.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here