Ekipa Ministeriu Defeza (MD) no Komandu F-FDTL hala’o enkontru anuál ho Governu Austrália hodi deskute no avalia Programa Kooperasaun Defeza Austrália hodi ajuda F-FDTL, iha salaun enkontru Komandu F-FDTL Fatuhada, Dili, Tersa (25/06/2019). Imajen/MD

DILI, 25 juñu 2019 (TATOLI)-Ekipa Ministériu Defeza no Komandu FALINTIL-Forsa Defeza Timor-Leste (F-FDTL), ohin, iha Dili, konvoka hikas enkontru avaliasaun ho Estadu Australia liuhusi nia embaixada iha Timor-Leste hodi halo diskusaun ba modelu futuru kooperasaun entre nasaun rua iha area defeza.

Sorumutuk ne’ebé hala’o iha salaun enkontru Kuartél  Jenerál F-FDTL, Fatuhada, Dili, nu’udar enkontru annual ba dala-12 ne’ebé partisipa direita husi Embaixadór Australia mai Timor-Leste, Peter Robert.

Embaixadór Peter Robert dehan, Austrália iha kometimentu hodi ajuda setór defeza Timor-Leste liuhusi kapasita rekursu umanu membru F-FDTL sira hala’o treinamentu hamutuk iha Timor-Leste no ba Austrália, inklui ajuda fasilidade infraestrutura F-FDTL.

“Austrália iha kometimentu nafatin apoiu Timor-Leste hodi kontinua programa barak iha área treinamentu rekursu no apoiu fasilidade ba F-FDTL,” hateten Embaixadór Peter ba jornalista hafoin enkontru ne’e.

“Ha’u fiar katak, kooperasaun hanesan ne’e importante duni, tanba Austrália nia seguransa mak Timor-Leste nia seguransa, no Timor-Leste nia seguransa maka Austrália nia seguransa”.

Peter hatutan, Austrália konsidera Timor-Leste nu’udar nasaun maun ho alin ne’ebé sei ajuda malu too lori Timor-Leste hetan moris di’ak hodi hakat ba dezenvolvimentu.

Nia dehan, ró patrulla rua ne’ebé Austrália sei fó ba Timor-Leste agora sei kontinua nia konstrusaun no sei too  mai Timor-Leste iha tinan 2023.

Durante ne’e reprezentante Forsa Defeza Austrália hamutuk ema na’in 29 mai Timor-Leste servisu ho Komandu F-FDTL hodi fó treinamentu ba membru F-FDTL tuir kursu lian Ingles no kursu atu partisipa iha misaun dame Nasoins Unidas (ONU) nian.

Iha fatin hanesan, Xefe Inspesaun Jerál FALINTIL Forsa Defeza Timor-Leste (F-FDTL), Brigadeiru Jenerál, Cornelio Ximenes “MAUNANA” hato’o agradese ba Governu Austrália no Forsa Defeza hahú fó apoiu ba F-FDTL dezde 2000 too agora.

“Ami agradese tanba ohin enkontru ami reforsa fila fali kooperasaun ne’ebé Australia fó ba F-FDTL,” Maunana hateten.

Brigadeiru Jenerál Maunana hatutan, F-FDTL presiza hetan treinamentu hodi lori forsa ne’e iha rekursu kualifikadu no hadi’a infraestrutura hodi dezenvolve forsa sai di’ak liután.

Nia konsidera, F-FDTL agora prepara aan atu halo misaun dame iha ONU no agora membru barak ba eskola iha akademia militár Austrália nian de’it liu ona ema na’in 270.

“Ita nia forsa kuaze 270 resin maka ba ona tuir treinamentu iha Austrália no vizita kortezia ba akademia militár Austrália,” nia tenik.

Tuir planu, Komandu F-FDTL ho Governu Austrália sei asina akordu kooperasaun konjuntu hodi Austrália aliña nafatin sira nia apoiu ba F-FDTL tuir akordu.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here