Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 25 juñu 2019 (TATOLI) – Prezidente Tribunál Rekursu (PTR), Deolindo dos Santos informa husi rezultadu Inpesaun Juíz ne’ebé Tribunál Rekursu (TR) halo ona, iha tempu badak sei iha movimentu judisiál.

“Husi rezultadu inspesaun ne’e iha tempu badak nia laran sei iha movimentu judisiál bazeia ba rezultadu, entaun hato’o ba Prezidente Repúblika  katak iha juíz balun ne’ebé mak sei mai Díli no balun husi Díli ba fali Baucau, Oe-cusse, no Suai, husi Oe-cusse no Suai bele mai fali Díli,” tenik Prezidente Tribunál Rekursu ba jornalista sira hafoin enkontru semanál ho PR Lú-Oló iha Palásiu Prezidensiál, tersa ne’e.

Nia dehan, desizaun inspesaun mak determina katak juíz ida iha kondisaun atu koloka iha fatin ne’ebé no ba kestaun ne’e TR tenta atu halo movimentu judisiáriu iha tempu badak.

“Ha’u nu’udar Prezidente Konsellu no iha Konsellu rasik tenta atu finaliza prosesu ida ne’e antes ita tama feriadu judisiál iha inísiu augostu, ida ne’e mak ami tenta atu halo ho forma ne’ebé lais liután,” katak nia.

Tuir Deolindo, prosesu ne’e kuaze falta 5% para finaliza ona tanba iha formasaun ba juís sira husi terseira klase ba segunda klase no prosesu finaliza husi segunda klase ba primeira klase ne’ebé mak sei bele hotu mais tarde iha meiadu jullu nia laran.

Nia haktuir, enkontru ohin ho Xefe Estadu atu koa’lia kona-ba serbisu Tribunál nian ne’ebé mak halo ona no saida mak seidauk halo no saida mak presiza hadi’a di’ak, nune’e bele kria justisa di’ak liután iha futuru. PR mós hakarak hatene prosesu inspesaun ba juís sira

“Prezidente Repúblika atu haree prosesu sira ne’e la’o to’o ne’ebé ona no ha’u dehan prosesu ne’e durante la’o ho forma ne’ebé mak di’ak liután tanba agora ita iha apoiu ne’ebé mak di’ak husi maluk sira ne’ebé fó asesoria Tribunál em primeira distánsia no iha Tribunál Rekursu, entaun prosesu ne’e mezmu la la’o ho ritmu lais liu, maibé la’o ho forma di’ak liu tan do que tempu hirak liubá,” dehan PTR.

Jornalista. : Julia Chatarina

Editór.       : Rafy Belo

HAKEREK NO HATÁN

Please enter your comment!
Please enter your name here