Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 25 juñu 2019 (TATOLI)–Prezidente Tribunál Rekursu (PTR), Deolindo dos Santos lakohi fó komentáriu ba despaixu Governu hodi nomea Francisco Kalbuadi Lay nu’udar Autoridade Nasionál ba Espozisaun 2020 iha Dubai, maski Tribunál Distritál Dili (TDD) aplika ona medida kausaun Termu Identidade Rezidénsia (TIR) ba Kalbuadi.

“Ne’e la’os ha’u mak pronúnsia. Ne’e desizaun Governu no Parlamentu Nasionál (PN) nian ne’ebé sira iha kompeténsia rasik,” nia hatán ba pergunta jornalista sira hafoin hala’o enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, tersa ne’e.

PTR informa, kazu ne’ebé iha relasaun ho kestaun polítika nia labele pronúnsia buat ruma tanba lei bandu.

“Ha’u labele pronúnsia. Buat ne’ebé iha relasaun legál ne’e kompeténsia primeira instánsia (Tribunál Distritál Dili) tanba julgamentu iha primeira instánsia no iha inkéritu karik ne’e kompeténsia Ministériu Públiku nian, la’ós kompeténsia Tribunál Rekursu. Tanba ne’e, ha’u labele pronúnsia tanba seidauk to’o iha ne’ebá,” nia dehan.

Francisco Kalbuadi Lay rasik agora dadauk nu’udar deputadu eleitu hosi Aliansa Mudansa ba Progresu (AMP) no atuál deputadu bankada Kongresu Nasionál Rekonstrusaun Timor (CNRT-sigla portugés).

Parte seluk, liuhosi sesaun plenária ohin, iha Parlamentu Nasionál, Deputadu Bankada Opozisaun FRETILIN, José Agostinho Sequeira ‘Somotxo’ kestiona desizaun Governu hodi nomea Kalbuadi nu’udar Autoridade Nasionál ba espozisaun nível internasionál iha Dubai.

“Ha’u kestiona señor Francisco Kalbuadi Lay ne’ebé Estadu Timor-Leste indika lidera espozisaun iha Dubai, tanba nia iha Termu Identidade Rezidénsia (TIR).  Ne’e duni, Timor-Leste ne’e ema mak Kalbuadi de’it ona ka oinsá (?). Tanba reprezenta Estadu ha’u hanoin ita hotu tenke ko’alia tanba Timor-Leste apezár ki’ik-oan maibé tenke iha dignidade,” nia halo intervensaun durante sesaun plenária.

Jornalista: Julia Chatarina

Editór: Xisto Freitas

Lee mós notísia ida ne’e: http://www.tatoli.tl/2019/06/nomea-ba-autoridade-espozisaun-dubai-francisco-kalbuadi-agradese-konfiansa-governu/

HAKEREK NO HATÁN

Please enter your comment!
Please enter your name here