Komandante Polisia Munisipiu Dili, Superintendente Xefe Armando Monteiro

DILI, 25 juñu 2019 (TATOLI)-Komandu Polisia Munisípiu Dili, ohin, halo intervensaun hodi hapara asaun demonstrasaun  ne’ebé hala’o husi grupu traballadór sira hasoru Kompañia Miramar Block Lda iha Delta, Comoro, Dili.

Komandante Polisia Munisípiu Dili, Superintendente Xefe Armando Monteiro, klarifika katak, Polisia hapara asaun ne’e, tanba traballadór sira halo asaun seidauk hetan lisensa husi polisia.

Armando esplika, traballadór no Sindikatu Jerál Traballadór Timor-Leste (SJT-TL) hato’o duni karta pedidu lisensa atu halo asaun hasoru Kompañia Miramar, maibé karta ne’e tuir lei PNTL tenke halo estudu loron lima foin fó resposta, maibé karta ne’e seidauk hetan aprovasaun, ohin, traballadór sira halo ona asaun, tanba ne’e, PNTL halo servisu tuir lei hapara asaun hodi husu Kompañia no SJT-TL no traballadór rezolve problema tuir dalan familiar.

 “Iha duni karta haruka mai hodi husu lisensa, maibé tuir lei PNTL tenke estuda lai lori prosesu loron lima foin aprova hodi koloka forsa akompaña demonstrasaun ho dame. Agora karta seidauk aprova sira halo ona asaun, tanba ne’e polisia hapara asaun,” dehan Komandante Armando Monteiro bainhira halo diálogu ho Advogadu Kompañia Miramar  no Sekretáriu Jerál SJT-TL iha Komandu PNTL Munisípiu Dili.

Komandante Armando husu atu kompañia no traballadór rezolve problema tuir dalan familiar hodi bele hetan solusaun.

Sekretariu Jerál SJT-TL, Almerio Vila Nova

Iha fatin hanesan, Sekretáriu Jerál SJT-TL, Almerio Vila Nova dehan, asaun ne’e traballadór na’in 10 ne’ebé servisu iha Kompañia Miramar Block lamenta tanba kompañia viola sira nia direitu servisu.

Nia hato’o agradese ba Komandu PNTL Dili konsege halibur parte kompañia no traballadór hodi rezolve problema ho ulun malirin.

Almerio dehan, SJT-TL prepara hela pontu haat ba Kompañia Miramar atu haree  problema kontratu servisu ba traballadór sira, respeita regra lisensa anuál ba traballadór, rezolve saláriu désimu terseiru no rezolve traballadór na’in 10 nia problema hodi kontinua servisu.

“Asaun traballadór sira halo, tanba kompañia la kumpre traballadór sira nia direitu hanesan pontu haat temi ne’e, tanba ne’e mak ohin traballadór halo asaun,” Almerio esplika.

Almerio esplika, problema traballadór hasoru patraun Miramar Block akontese tanba mákina prodús block aat no patraun haruka traballadór sira ba deskansa iha uma hodi hein mákina di’ak maka foin kontinua servisu fali. Maibé depois traballadór sira ba deskansa kompañia lakohi selu sira nia saláriu anuál.

Advogadu Kompañia Miramar, Manuel Gonçalves

Responde ba preokupasaun ne’e, Advogadu Kompañia Miramar, Manuel Gonçalves esplika parte kompañia lamenta traballadór sira halo asaun greve hodi la koordena ho parte polisia inklui kompañia.

Advogadu ne’e dehan, na’in ba Kompañia Miramar Block lamenta no hakfodak bainhira haree traballadór lori SJT-TL ho ema besik 200 liu halo asaun greve ba kompañia.

“Kompañia hakarak rezolve problema ne’e, maibé traballadór halo uluk ona asaun, entaun ami konsidera asaun ne’e ilegál tenke hapara para ita buka solusaun,” Advogadu ne’e sujere.

Nia dehan, Kompañia Miramar fó servisu ba traballadór besik 200, no traballadór na’in 10 mak halo problema hasoru kompañia.

Kona-ba kontratu servisu, Advogadu ne’e esplika iha fulan fevereiru 2019 nia laran kompañia halo remata ona  hodi hein diretór kompañia atu asina no fó ba traballadór sira mós atu asina kontratu. Maibé, tanba Diretór Kompañia moras no la tama servisu ikus mai traballadór sira reklama hodi halo problema ba SJT-TL hodi hasoru kompañia.

Nia garante katak, kompañia prontu koopera ho SJT-TL hodi rezolve problema ne’e tanba mosu dezentendimentu komunikasaun entre traballadór no kompañia.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here