Ministru Ensiñu Superiór, Siénsia no Kultura, Longuinhos dos Santos. Imajen: Egas Cristóvão

DILI, 25 juñu 2019 (TATOLI)—Ministériu Ensiñu Superiór, Siénsia no Kultura (MESSK), prodúz ona diploma ministeriál hodi regula kandidatu sira ne’ebé asesu Universidade Nacional Timor Lorosa’e (UNTL).

“Agora dadaun ita prodúz ona diploma ministeriál katak diploma ministeriál ida ne’e mak sei matadalan (guia) ba ita, liliu UNTL ho IPB (Institutu Politékniku Betano). Tanba, universidade públiku atu halo rekrutamentu tenke liuhosi kanál tolu, hanesan  rejime espesiál, opurtunidade no kanál jerál iha tinan oin,” Ministru Ensiñu Superiór, Siénsia no Kultura, Longuinhos dos Santos, dehan liuhosi konferénsia ba imprensa iha salaun MESSK, Kolmera, Dili, ohin.

Ministru Longuinhos informa, rejime espesiál ba veteranu nia oan tenke kontinua, tanba sai tiha ona lei.

“Loos. Ita loke hela prosesu ida ne’e tanba sai hanesan lei ona, maibé governu iha polítika ida oinsá mak atu bele hadi’a sistema no mekanizmu molok atu halo rekrutamentu,” nia haklaken.

Nia akresenta, diploma ministeriál ne’e iha sistema no regra ne’ebé mak rigorozu no konteúdu hosi diploma ministeriál ne’e atu bele fortifika ba lala’ok no sistema ba prosesu rekrutamentu estudante foun ne’ebé mak atu tama UNTL no mós Institutu Politéknika Betano.

Maski númeru estudante ne’ebé asesu UNTL boot, maibé Ministru tenik katak ida ne’e la sai dezafiu, tanba sei halo kolaborasaun ho Ministériu Asuntu Veteranu nian.

“Depois ida ne’e ita sei kria Komisaun Konjuntu ida. Komisaun Konjuntu ne’e mak responsabiliza tomak. Ministru, reitór UNTL ho Prezidente IPB sei la tama iha ne’ebá. Rezultadu ne’ebé fó sai, komisaun mak anúnsia,” nia esplika.

Jornalista: Evaristo Soares Martins

Editór: Xisto Freitas

Lee mós notísia ida ne’e: http://www.tatoli.tl/2019/01/estudante-nain-2-986-aprovadu-tama-untl/

HAKEREK NO HATÁN

Please enter your comment!
Please enter your name here