Prezidente Tribunál Rekursu, Deolindo dos Santos. Imajen/Egas Cristovão

DILI, 25 juñu 2019 (TATOLI)Prezidente Tribunál Rekursu (PTR), Deolindo dos Santos hateten Lei Organizasaun Judisiáriu importante atu reforsa Reforma Lejizlativa ne’ebé Parlamentu Nasionál (PN) no Governu elabora hela.

Nia haktuir, enkontru ho Prezidente Repúblika (PR), Francisco Guterres Lú-Olo, preukupa uituan ba asuntu ne’e tanba ne’e ohin ko’alia uituan kona-ba meiu saida mak presiza halo iha Reforma Lejizlativa.

“Ha’u hato’o ba Prezidente Repúblika katak loos duni situasaun ne’e iha no diploma barak mak presiza haree iha Reforma Lejizlativa nian hanesan saida mak Parlamentu Nasionál no Governu hanoin no situasaun konkretu liu presiza haree tuir perspetiva ha’u nian nu’dar Prezidente Tribunál Rekursu no Prezidente Konsellu Majistratura katak ita presiza halo esforsu iha nível polítiku ba Parlamentu Nasionál no Governu atu iha ona diskusaun no aprovasaun ba Lei Organizasaun Judisiáriu nian,” nia tenik ba jornalista sira hafoin hala’o enkontru semanál ho Xefe Estadu, Francisco Guterres Lú-Olo, iha Palásiu Prezidente Nicolau Lobato, Bairru Pité, tersa ne’e.

Tuir Deolindo nia haree katak Lei Organizasaun Judisiáriu fundamentál tanba hosi lei ne’e mak bele defini Organizasaun Judisáriu nian.

“Agora iha ona proposta mai hosi Governu no ami (Tribunál Rekursu) nia pareser hato’o ona ba Governu iha fulan haat liu-ba no ami hein Ministru Justisa bele lori ona ba Konsellu-Ministru hodi desidi no lori fali ba Parlamentu Nasionál hodi diskuti. Ida ne’e ami nia esperansa,” nia reforsa.

Maski nune’e, nia dehan, la taka dalan ba PN hodi iha inisiativa rasik ba lejizlasaun hodi reforsa prosesu Reforma Lejizlativa.

“Lei Organizasaun Judisiáriu ne’e lei baze ne’ebé importante no presiza haree iha tempu badak nia laran ho lei seluk. Maibé, tuir ha’u nia haree katak Lei Organizasaun Judisiáriu mak importante liu,” Deolindo akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here