Edifísiu Institutu Politékniku Betano. Imajen/Espesiál

DILI, 25 juñu 2019 (TATOLI)Governu liuhosi Ministériu Ensiñu Superiór, Siénsia no Kultura (MESSK), sei moderniza Institutu Politékniku Betano (IPB).

“Ministériu Ensiñu Superiór, iha hanoin liuhosi polítika ne’ebé iha katak, para bele garante kualidade, entaun hakarak ka lakohi ministériu tenke moderniza Institutu Politékniku Betano, tanba IPB kontempla ona iha Planu Estratéjiku Dezenvolvimentu Nasionál (PEDN),” dehan Ministru Ensiñu Superiór, Siénsia no Kultura, Longuinhos dos Santos liuhosi konferénsia ba imprensa, iha salaun MESSK, Kolmera, Dili, ohin.

Nia dehan, governu sei alarga tan politékniku iha munisípiu balun hanesan Lautém, Manatuto no Covalima. Maibé, tinan ne’e no tinan 2020, sei hahú konstrusaun uluk ba infraestrutura IPB nian.

“Institutu Politékniku Betano sai hanesan referénsia antes ita dezenvolve politékniku iha munisípiu sira seluk,” Longuinhos hatutan.

Nia esplika, dezeñu no bill of quantity (BOQ) prepara ona hosi governu anteriór, oras ne’e serbisu hamutuk ho Ministériu Obra Públika, atu halo padronizasaun ba BOQ, nune’e redúz presu ba materiál infraestrutura tenke tuir presu Timor nian. MESSK prevé milliaun $20 ba prosesu kontrusaun Institutu Politékniku Betano iha tinan 2020.

Jornalista: Evaristo Soares Martins

Editór: Xisto Freitas

Lee mós notísia ida ne’e: http://www.tatoli.tl/2019/06/ipb-untl-asina-nota-entendimentu-no-akordu-kooperasaun/

HAKEREK NO HATÁN

Please enter your comment!
Please enter your name here