Ministru Longuinhos dos Santos. Foto TATOLI: Egas Cristóvão

DILI, 25 juñu 2019 (TATOLI)Governu liuhosi Ministériu Ensiñu Superiór, Siénsia no Kultura (MESSK), sei fasilita profesór lian portugés ba ensiñu superiór privadu sira iha tinan 2020.

Ministru Ensiñu Superiór, Siénsia no Kultura, Longuinhos dos Santos, komesa haree ona oinsá mak bele promove profesór sira hosi ensiñu superiór privada sira atu bele apriende lian portugés.

“Tinan 2020 ita fiar katak padronizasaun ensiñu superiór privada sira iha universidade ida-idak ita estabelese profesór portugés ema na’in ida-ida para hala’o formasaun ba lian portugés, nune’e ita iha alvu ida katak to’o tinan 2023 ita bele prodúz ona profesór portugés ida kualidade,” dehan nia iha edifísiu MESSK, Kolmera, Dili, ohin.

Ministru Longuinhos salienta, governu mak fasilita entaun saláriu ba profesór ne’e selu hosi governu.

Nia afirma, alvu governu nian mak atu hetan formandu no dosente kualifikadu iha lian portugés. Tinan ida ne’e, governu rektura dosente lian portugés nian na’in tolu de’it, tanba orsamentu ne’ebé prevé uituan de’it.

Nune’e mós, tuir Longuinhos, governu sei oferese bolsu estudu ba universidade privada hotu-hotu, maibé ho sistema ano zero (nol tahun), atu bele haruka sira ba eskola iha Nasaun Ko’alia Lian Portugés (CPLP-sigla portugés), nune’e apriende língua portugés no apriende mós siénsia iha CPLP.

“Ida ne’e mak polítika Ministériu Ensiñu Superiór nian, liliu atu bele fasilita no reforsa dosente sira para bele hanorin alin estudante sira iha universidade privadu sira,” nia haklaken.

Nia hateten, universidade públiku hanesan Universidade Nacional Timor Lorosa’e (UNTL) di’ak hela, tanba durante ne’e uza língua portugés, maibé ensiñu superiór privada sira mak problema.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here