Xefe Inspesaun Jerál F-FDTL, Brigadeiru Jeneral, Cornelio Ximenes “Maunana” halo vizita ba Cairns-Austrália hodi halo inspesaun ba Ró Patrulla Klase-Protetór, Te Matili II ne’ebé oferese husi Austrália ba nasaun Pasífiku Tuvalu atu fó apoiu ba seguransa marítima. Imajen/espesiál

DILI, 25 juñu 2019 (TATOLI)- Xefe Inspesaun Jerál FALINTIL-Forsa Defeza Timor-Leste (F-FDTL), Brigadeiru Jenerál, Cornelio Ximenes “Maunana” agradese ba Governu Australia no Komandu Forsa Defeza Austrália,  ne’ebé fasilita  formasaun ba membru Forsa Navál F-FDTL atu prepara aan lori Ró Patrulla Klase-Protetór rua ne’ebé Australia  sei fó ba Timor-Leste iha 2023.

Liuhusi Programa Kooperasaun Defeza Australia, foin lalais ne’e, konvida delegasaun nivel altu F-FDTL, Brigadeiru Maunana, Segundu Tenente dos Santos no Segundu Tenente Nascimento no Diretór Planeamentu Estratéjiku Polítika Internasionál Ministériu Defeza, Gonçalves  halo vizita ba Cairns-Austrália atu halo inspesaun Ró Patrulla Klase-Protetór, Te Matili II ne’ebé oferese husi Austrália ba nasaun Pasífiku Tuvalu atu fó apoiu ba seguransa marítima.

“Ita hakarak aban bainrua, ita sei lori F-FDTL sai forsa ida profisionál liuhusi treinamentu ne’ebé Australia fó,” dehan  Brigadeiru Maunana ba jornalista, ohin, iha Kuartél Jenerál F-FDTL, Fatuhada, Dili.

Governu Austrália konvida mós komandante sira ne’e halo viajen ho ró ne’e la’o hale’u tasi laran hanesan parte husi ezersísiu tasi nian no asiste lansamentu Ró Rígido Casco Inflável (RHIB-sigla inglés) ne’ebé rekupera husi ró  ne’e.

Austrália mós konstrui daudaun ona Ró Patrulla Klase-Protetór ba Timor-Leste ne’ebé sei oferese iha tinan 2023. Vizita ne’e sai hanesan oportunidade di’ak tebes ba delegasaun nivel altu sira atu halo inspesaun ba ró ne’e no hametin relasaun rejionál entre Timor-Leste, Austrália no nasaun Pasífiku sira seluk.

Iha vizita ne’e, Tenente Nascimento mós akompaña ekipa iha ró halo viajen ba Vanuatu.

“Ró ne’e mai karik ita nia forsa bele iha ona kapasidade para bele simu hodi fó seguransa ba ita nia tasi, liu-liu asegura iha fronteira maritima,” afirma Maunana.

 Ba futuru, tenik Maunana, F-FDTL sei koopera ho Forsa Indonézia inklui Forsa Austrália hodi halo seguransa kontrolu mós fronteira tasi nian too fronteira rai maran.

Nota komunikadu ne’ebé Ajénsia Tatoli asesu husi portál Australia in Timor-Leste hato’o parabéns ba Segundu Tenente Jacinto Nascimento CO-NRDTL ‘Kamanasa’ ne’ebé foin lalais hetan kolokasaun ba iha Ró Patrullamentu Repúblika Tuvalu Te Mataili II iha Cairns, Queensland Austrália durante semana tolu.

Te Mataili II ne’e hanesan ró patrullamentu segundu husi ró 21 ne’ebé konstrui ona husi Kompañia Konstrutór ró Austrália Australia, atu fornese ba nasaun 12 iha Illa Pasífiku no Timor-Leste liuhusi Programa Seguransa Marítima Pasífiku ninian.

Tenente Nascimento hetan, esperiénsia valiozu ho sistema no ekipamentu ne’ebé montadu iha ró  ne’e, inklui sistema monitoramentu ponte enjeñaria Marine Link no sistema bee osmosis reversa ne’ebé eziste.

Tenente Nascimento impresionadu tebes ho ró ninia abilidade indikadór, velosidade no rezisténsia durante loron 20 iha tasi laran. Ne’e hanesan parte husi programa treinamentu molok ró patrullamentu rua ne’ebé Australia oferese ba Timor-Leste sei to’o iha tinan 2023.

Husi sorin seluk, rede sosiál Facebook  Australia in Timor-Leste haktuirGovernu no Militár  Australia kontente haree ekipa treinamentu mentoria primeiru brigada tropa Australianu terseiru pelotaun serbisu hamutuk ho F-FDTL atu harii kapasidade entre ekipa rua ne’e iha baze militár Metinaro.

Iha Futuru, Timor-Leste iha interese hakarak hola parte iha operasaun misaun ba pás ONU nian iha rai li’ur.  Treinamentu ne’e foka liu ba kapasidade prinsipál sira ne’ebé presiza atu bele hetan aprovasaun husi ONU ba operasaun sira ne’e.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here