Ministru Ensiñu Superiór, Siénsia no Kultura, Longuinhos dos Santos. Imajen Tatoli/Egas Cristóvão

DILI, 25 juñu 2019 (TATOLI)Kurríkulu padraun mínimu ninian dezenvolvidu ona hosi Ministériu Ensiñu Superiór, Siénsia no Kultura (MESSK), nune’e ba futuru ensiñu superiór públiku no privada implementa kurríkulu ida de’it.

Haree ba sistema aprendizajen ne’ebé mak adopta hosi ensiñu susperiór públiku no mós ensiñu superiór privada sira diferente iha implementasaun ba kurríkulu, tanba UNTL uza lian portugés, maibé universidade privada sira uza lian Indonézia.

“Kontéudu hosi kurríkulu padraun mínimu ne’e ho intensaun uniformiza universidade hotu-hotu implementa kurríkulu ne’ebé hanesan, rejime jurídiku mós hanesan,” Ministru Ensiñu Superiór, Siénsia no Kultura, Longuinhos dos Santos, tenik liuhosi konferénsia ba imprensa iha salaun MESSK, Kolmera, Dili, ohin.

Nia rekoñese katak labarik sira iha ensiñu primária, pre-sekundária no sekundária apriende língua portugés, maibé ba universidade privada sira simu matéria ho língua Indonézia.

“Ida ne’e mak governu liuhosi Ministériu Ensiñu Superiór atu uniformiza kurríkulu liuhusi rejime jurídiku padraun mínimu. Ida ne’e dezenvolve hotu sei aprezenta ba Konsellu Ministru atu aprova hafoin implementa iha universidade hotu-hotu, tantu ensiñu superiór públiku no mós privada sira,” Longuinhos esplika.

“Kurríkulu agora dadaun ita dezenvolve hela liuhosi ita-nia jurídiku. Iha jullu nia-rohan ita bele finaliza ona para depois ita aprezenta,” nia salienta.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Kurikulo ensino superior, tenke involve entidade sira hotu, liu-liu instituisaun ensino superior privadu sira, inklui mos kada departemento sira neebe esiste iha ensino superior sira tenke involve hotu atu nunee hodi forma kurikulo ida neebe tuir realidade ka kondisoens TIMOR nian no mos kampo de trabalho iha bazar. Se lae ita halo kurikulo oin ida nia implementasaun oin seluk, signifika la korespondensia ba situasaun riil ka realidade nebe povu ho nasaun imprenta.
    Obrigado.

HAKEREK NO HATÁN

Please enter your comment!
Please enter your name here