Ministru Defeza, Filomeno da Paixão de Jesus, kaer liman ho Primeiru Asistente Sekretáriu ba Polítika Internasionál, Ministériu Defeza Austrália, Hugh Jeffrey durante hala’o enkontru kortezia iha edifisiu Ministériu Defeza Fatuhada, Dili, Segunda (24/6/2019). Imajen/MD

DILI, 25 juñu 2019 (TATOLI) – Governu Austrália sei fasilita formasaun ba membru Komponente Naval, FALINTIL-Forsa Defeza Timor-Leste (F-FDTL),  hodi prepara rekursu tékniku ba ofisina militár hodi bele simu ró Patrulla Klase-Protetór ne’ebé apoiu husi Estadu Australia.  Aleinde ne’e, Australia mós sei hadi’a kondisaun infraestrutura Portu Hera nian.

Primeiru Asistente Sekretáriu ba Polítika Internasionál, Ministériu Defeza Austrália, Hugh Jeffrey, hato’o kompromisu Australia nian ne’e durante hala’o enkontru amigavél ho Ministru Defeza no Ministru Interior Interinu Brigadeiru Jenerál, Filomeno da Paixão de Jesus, segunda (24/6/2019), iha Ministériu Defeza, Fatuhada, Dili.

Sorumutuk ne’e  nu’udar  jestu  hodi hatudu vontade Governu Australia nian atu hametin liu tan kooperasaun bilaterál entre rai rua, iha area dezenvolvimentu institusionál defeza no seguransa.

Oportunidade ne’e, Hugh Jeffrey entrega mós ezbosu Memorandu de Entendimentu (MdE) ida ba Ministru Defeza no Ministru Interior Interinu ne’ebé define atividade sira atu Timor-Leste ho Austrália sei hala’o hamutuk iha ámbitu preparasaun no kapasitasaun ekipa F-FDTL ró rua ne’ebé atu oferese husi Australia to’o iha Timor-Leste iha 2023.

Ministru Defeza Filomeno Paixão, lori Governu Timor-Leste nia naran hato’o agradese ba apoiu Governu Australia no simu ezbosu MdE hodi hatete katak Governu Timor-Leste, konkorda ho atividade sira ne’ebé temi iha MdE ne’e, maibé Timor-Leste sei estuda MdE ne’e molok parte rua asina.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here