Cornelis Nahak Portela "Aquilis"

DILI, 23 juñu 2019 (TATOLI)—Hanesan manu semo hosi knuuk sai ba buka hahán, sei fila hikas mai iha nia knuuk. Hanesan jogadór, bele ba joga iha rai ne’ebé de’it, sei fila hikas mai nia horik fatin.

Nia isin morenu no fuuk kribu. La’o fihir-án jeitu hanesan malae Cabo-verdianu ida. Teki-oan sira kuandu matan-fihir sala, hanoin Cabo-verdianu tebes. Laran bele monu ba nia. Maibé lae. Nia timoroan puru. Aman hosi rai-ulun Lospalos naran Adolfo Portela no inan naran Josefa Setilda Luru Pria husi rai-ikun (Atambua).

Lalika laran susar. Nia mak Cornelis Nahak Portela ne’ebé koñesidu ho “Aquilis”. Naran ida Aquilis, la’ós naran ida be boot mesa-mesak. Naran ida ne’ebé boot tanba futeból. Hosi futeból, lori nia naran sai boot lemorai to’o rai-badin ne’ebá.

Nia hahú ninia kareira iha futeból hosi klube AD SLB Laulara. Hanesan ahi-matan lori sai suar ba li’ur, SLB mak hahoris no promove nia ba li’ur. Ho SLB, klube estranjeiru hateke hetan ninia performidade jogu. Nia joga di’ak. Joga ho tékniku furak. Joga ho arte. Tan ne’e, klube ne’e laran monu kedas ba nia. Klube ne’e naran Malaga hosi España (Europa).

Kuaze tinan tolu ona Aquilis hetan kontratu hosi Malaga. Malaga kontratu nia ho montante osan €48.000 kada tinan. Iha klube ne’e, nia la’ós jogadór baibain. Nia hetan previleiju. Hetan atensaun espesiál. Sai kapitaun ekipa ho númeru kamizola (7) ho pozisaun hanesan médiu avansadu.

Ninia kontratu iha Malaga sei ramata iha tinan oin. “Ha’u nia kontratu iha ne’ebá sei ramata iha tinan oin. Agora, Vila Real ho Sevila mak tau-matan hela mai ha’u, katak ha’u nafatin iha Malaga ka ba klube rua ne’e ida. Ida ne’e depende ba ha’u nia ajénsia ne’ebé haruka ha’u ba ne’e. Ha’u hein joga de’it. Se sira hakarak ha’u ba klube rua ne’e ida, ha’u tuir de’it,” tenik Aquilis ba jornalista sira iha Estádiu Munisipál Dili, domingu (23/6).

Nia fila hikas ona mai Timor iha fulan kotuk. Maibé, la signifika nia atu hela metin iha Timor. Nia mai pasa féria ho família sira. Fulan oin, nia fila hikas ba España hodi hatutan ninia kontratu restu ne’ebé sei iha.

Hanesan jogadór profisionál, Aquilis enkoraza ninia maluk jogadór timoroan sira atu hadomi talentu hodi labele mete arbiru nune’e sai jogadór ne’ebé di’ak para halo morin Timor -Leste nia naran iha mundu liuhosi futeból.

Nia la foti án maski semo ona ba internasionál. Nia dehan, nia lahaluha no sei lahaluha klube ne’ebé uluk promove nia. Nia promete, bainhira nia reforma iha rai li’ur, nia sei fila hikas mai halo ramata nia kareira hanesan jogadór iha AD SLB Laulara.

“Aban bairua ha’u reforma, ha’u sei mai joga iha ha’u nia klube anteriór (SLB),” Aquilis promete ho fuan.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here