Prezidente Arquivo Museum de Resistência Timor-Leste (AMRT), Instituisaun Públiku (I.P), Hamar Antoninho Baptista Alves

DILI, 25 juñu 2019 (TATOLI)Arquivo & Museu da Resistência Timorense (AMRT) asina ona nota entendimentu (MoU-sigla inglés) ho Fundação Oriente ho objetivu atu prepara funsionáriu sira iha Muzeu Rezisténsia ba tuir formasaun espesialidade iha área muzeulojia liliu prezervasaun objetu no dokumentu istóriku sira.

“Fundação Oriente disponível ba ami-nia proposta atu kapasita ita-nia ema iha área espesiál sira  hanesan prezervasaun dokumentu, prezervasaun objetu, preparativu asaun ba konseitu espozisaun, atu ita bele projeta ba labarik sira no prepara sira sai hanesan espesialista ba área muzeulojia,” dehan Diretór Ezekutivu no Prezidente Arquivo & Museu da Resistência Timorense (AMRT), I.P, Hamar Antoninho Baptista Alves, ba Agência TATOLI liuhusi entrevista iha nia kna’ar fatin, Dili, tersa ne’e.

Tuir planu, nia esplika, formasaun ne’e sei hala’o iha Portugal no muzeu rezisténsia sei haruka   uluk ema na’in tolu (3). Iha ne’ebá, sira sei apriende kona-ba biblioteka no metodulojia konsulta kona-ba biblioteka nian. Aleinde ne’e, sira sei apriende mós iha área muzeulojia ne’ebé serbisu ba iha ámbitu tratamentu objetu, tratamentu dokumentu no imajen sira.

Hamar hatutan, sei tuir mós formasaun ne’ebé halai ba kultura edukativa. Tanba, iha área kultura edukativa ne’e presiza asaun ida dinámiku liu no kriativu tebe-tebes ba instituisaun ida, oinsá atu halo diseminasaun ba istória liuhusi kapasidade ba espozisaun iha atividade kulturál.

“Sira tenke sai ba apriende ida ne’e para fila fali mai manán esperiénsia uituan ona atu halo interligasaun ho instituisaun relevante, serbisu no kooperasaun ba eventu sira. Ho nune’e, bele  dada labarik sira-nia atensaun para ita-nia istória ne’e labele mate. Entaun, unidade ida ne’e mak bele sai hanesan motór ka mákina motivasaun ba kultura edukasaun,” Hamar esplika.

Nia informa, Muzeu Rezisténsia dadaun ne’e iha funsionáriu maizumenus hamutuk ema na’in 43 ne’ebé maioria ema sira ne’e kuaze elementu ba manutensaun edifísiu no tékniku ba prezervasaun ninian ne’e. Sira laiha formasaun ida espesial ba área refere. Sira hirak ne’ebé hasai lisensiatura normál hosi eñsinu superiór sira ne’e laduun iha koñesimentu iha área prezervasaun.

Akordu ida ne’e validu ba tinan rua no ida ne’e hanesan kooperasaun daruak ne’ebé AMRT hala’o ho instituisaun seluk. Kooperasaun dahuluk, AMRT hala’o ho Fundação Mario Soares ne’ebé fó apoia ba rekollamentu no tratamentu ba dokumentu rezistensia sira. Daruak, estabelese akordu ho Fundação Oriente atu fó apoiu ba formasaun espesiál iha área muzeulojia.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here