Ilustrasaun Karteira Fundu Infraestrutura ba programa 22. Gráfika hosi Ministériu Finansa

DILI, 24 juñu 2019 (TATOLI)–Totál programa Fundu Infraestrutura hosi 13 sa’e ona ba 22 entre tinan 2011 to’o 2018. Fundu Infraestrutura (FI) ne’e mai hosi impréstimu externu no Parseria Públiku Privada (PPP) ne’ebé nia ezekusaun liuhusi orsamentu jerál Estadu (OJE).

Tuir Livru 3 Fundu Infraestrutura ne’ebé Agência Tatoli asesu, ohin, katak aumentu programa infraestrutura depende ba disponibilidade hosi fundu tanba limitasaun orsamentál ba implementasaun  projetu ne’ebé ho dimensaun boot.

Atualmente, eziste totál projetu hamutuk 1.576 liuhosi FI, ne’ebé 772 hosi totál ne’e konklui ona (dezde kriasaun FI iha tinan 2011), projetu 550 la’o hela dadauk no projetu 254 sei iha limitasaun iha finansiamentu.

Investimentu FI bazeia ba regulamentu juridíku FI inklui área estratéjiku sira hodi ajuda Timor-Leste bele atinje alvu nasionál ne’ebé defini ona iha Planu Estratéjiku Dezenvolvimentu (PED) tinan 2011 to’o 2030 no mós alvu globál ne’ebé Governu adota hanesan Objetivu Dezenvolvimentu Sustentável (ODS).

Governu implementa prioridade FI liuhosi finansiamentu projetu infraestrutura iha programa 22, ne’ebé interligadu ho prioridade PED no ODS ba bee no saneamentu (ODS 6), infraestrutura resiliente (ODS 9) no fornesimentu enérjia sustentável no barratu ba sidadaun hotu (ODS 7).

Nune’e, rezultadu implementasaun programa no projetu liuhosi FI entre tinan 2011 to’o terseiru trimestre 2018 aprova ona orsamentu biliaun $4,259, ne’ebé kompostu hosi verba governamentál sira no impréstimu externu. Orsamentu hirak ne’e reprezenta ezekusaun anuál %60.

Iha tinan 2019, Governu aloka osamentu ba FI hamutuk miliaun $367,506 inklui miliaun $280,506 ba projetu FI no miliaun $87 ba projetu ne’ebé hosi impréstimu.

Programa ba FI mak hanesan agrikultura, bee no saneamentu, dezenvolvimentu urbanu no rurál, eletrisidade, portu sira, aeruportu, programa ODS, Tasi Mane, impréstimu externu, sistema finanseiru no fundu infraestrutura ba apoiu, informátika, juventude no desportu, saúde, turizmu, edukasaun, solidariedade sosiál, ponte sira, defeza no seguransa, estrada sira, edifísiu públiku, preparsaun dezeñu no prestasaun serbisu ba supervizaun no ikus liu manutensaun no reabilitasaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here