PNSIK ho F-FDTL, Tersa (18/6/2019), kaptura ona suspeitu MP ne'ebé halai mai subar iha Quelicai ho Baguia, Baucau, hafoin envolve iha konfrontu grupu arte marsiál iha Naibonat, Kupang-Indonézia. Imajen/ Espesiál

DILI, 24 juñu 2019 (TATOLI)- Prokuradór Jerál Repúblika (PGR), José da Costa Ximenes esplika, Estadu Timor-Leste (TL) no Estadu Repúblika Indonézia (RI) mak iha kompeténsia aas liu atu diskute prosesu  tratamentu ba kazu suspeitu  MP nu’udar sidadaun Indonéziu ne’ebé Polisia Nasionál Investigasaun Kriminál (PNSIK) no Komponente Terrestre FALINTL-Forsa Defeza Timor-Leste (F-FDTL) kaptura iha Postu Administrativu Quelicai,  Munisípiu Baucau.

Prokuradór Jerál Repúblika (PJR), José da Costa Ximenes. Imajen/Egas Cristovão

Suspeitu MP deskonfia envolve direita iha konfrontu grupu organizasaun arte marsiál iha Naibonat, Kupang-Indonézia iha loron kinta, 6 juñu 2019, hodi hamate vítima ida ho naran, Ramos Horta no hakanek ema na’in haat. Polisia Indonézia konsidera suspeitu MP sai nu’udar autór prinsipál iha konfrontu ne’e.

Depois halo konflitu iha Kupang, Timor Osidentál (NTT-sigla indonézia),  liu loron rua, suspeitu halai tama ilegálmente mai Timor-Leste liuhusi fronteira Postu Administrativu Balibo, Munisípiu Bobonaro hodi mai Dili hodi halai liu ba subar iha Suku Lakuliu, Postu Administrativu Quelecai, Munisípiu Baucau.

“Materia kona-ba kooperasaun internasionál tenke haree husi kontestu Estadu ho Estadu la’ós polisia ho polisia, la’ós prokuradór ho prokuradór,” informa PJR José da Costa Ximenes, hodi responde jornalista, ohin, iha Palásiu Prezidensiál, Dili.

Nia dehan, mezmu PNTL kaptura ona suspeitu ne’e, maibé PNTL la iha kompeténsia kontaktu polisia Indonézia hodi lori suspeitu fila ba Kupang.

“Polisia la iha kompeténsia, tanba pedidu ne’e tenke ba autoridade Estadu, hanesan mós ita nia ema  iha Indonézia ema la haruka mai, desizaun ne’e iha Jakarta la’ós  iha Kupang. Nune’e mós iha  ne’e, desizaun la’ós iha polisia nia liman,”  tenik José Ximenes.

Suspeitu MP agora daudaun sei detein hela iha sela polisia Caikoli, Dili, hodi hein prosesu investigasaun.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here