DILI, 24 juñu 2019 (TATOLI)Diresaun Nasionál Meteorolojia no Geofízika (DNMG) fó sai katak rai nakdoko ne’ebé sente to’o iha Díli kuaze minutu ida, iha oras 11:53 otl, kauza hosi rai nakdoko iha Sudeste Maluku (Indonézia) ho tektónika magnitude 7,7 eskala richer iha profundidade kilómetru 220, maibé laiha poténsia tsunami.

“Haree hosi lokalizasaun Episentru no profunidade Hiposentru, rai nakdoko ne’ebé akontese kategoria rai nakdoko ho tipo moderadu, kauza hosi atividade subdiksaun tasi Banda,” refere pájina DNMG ne’ebé Agência TATOLI asesu iha segunda ne’e.

Tuir rezultadu análiza mekanizmu hatudu katak rai nakdoko iha parte ne’ebá levanta hosi deformasaun fatuk ho mekanizmu mudansa strike-slip fault.

Bazeia ba monitorizasaun hosi Estasaun Geofisica Kupang hatudu katak to’o agora seidauk iha atividade rai nakdoko ne’ebé tuir mai (gempa susulan/aftershock).

Antes  ne’e, liuhusi pájina Badan Meteorologi, Klimatologi dan Geofisika (BMKG) rejista rai nakdoko ho magnitude 5,2 eskala richer iha 10:28 WIB, hosi profundidade kilómetru 251 Tasi Timor Sudeste Maluku no laiha poténsia tsunami.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here