DILI, 24 juñu 2019 (TATOLI)Prezidente Konfederasaun Desportiva Timor-Leste (CDTL-sigla portugés), Afrânio Xavier, hateten kada modalidade oras ne’e hala’o hela preparasaun ba eventu Sea Games.

“Sira-nia preparasaun la’o hela. Ita-nia alvu ne’e fila fali ba modalidade ida-idak. Se preparasaun di’ak, matéria atleta ne’e di’ak no kualifikadu ita bele hetan medalla. Maibé, ho kondisaun oras ne’e ita mós labele ejize buat barak,” nia dehan ba Agência TATOLI, iha Jináziu, Dili, ohin.

Nia hatutan, federasaun 12 iha ona faze preparasaun, tanba eventu Sea Games ne’ebé sei realiza iha Manila, Filipina, hela de’it fulan-lima.

Federasaun 12 ne’ebé sei partisipa iha Sea Games mak hanesan Atletizmu, Boxe, Siklizmu, Fubeból, Tenis Kampu, Tiru, Taekwondo, Natasaun, Karatedo, Silat Natasaun, Alterufilizmu no Voleiból.

“Tenke iha kondisaun atu fasilita sira liliu orsamentu. Orsamentu (budget) ba eventu ne’e rihun $100 de’it. Maibé, buat hotu ita hatama ba Sekretaria Estadu Juventude no Desportu atu desidi,” Afrânio informa.

Prezidente CDTL ne’e konsidera orsamentu rihun atus-ida ne’e limitadu, tanba modalidade 12 kedas.

“Atleta ho ofisiál sira hamutuk 80, la inklui Komité Olímpiku Nasionál Timor-Leste (CONTL-sigla portugés), CDTL no mós sira seluk. Ami halo reuniaun hodi esplika ba malu ona kona-ba preparasaun kada modalidade molok ba partisipa iha eventu internasionál,” nia esplika.

Jornalista: Evaristo Soares Martins

Editór: Xisto Freitas

Lee mós notísia ne’e: http://www.tatoli.tl/2019/06/sejd-forma-ekipa-akompana-preparasaun-ba-eventu-sea-games/

 

HAKEREK NO HATÁN

Please enter your comment!
Please enter your name here