Jogadór FC Porto Taibessi no FIEL hadau malu kabesa bola. Imajen Mídia LFA

DILI, 24 juñu 2019 (TATOLI)—Klube estimadu Munisípiu Dili, FC Porto Taibessi, susesu hadau pontu tolu hosi Fitun Estudante Lorosa’e (FIEL) iha jogu kontinuasaun Segunda Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairru Formosa, Dili,  ohin lorokaik.

Golu vitória ba Porto Taibessi marka hosi Lázio Piedade iha minutu 83 no Nílvio Almeida iha minutu 88. Entretantu, golu FIEL hatama hosi José Campos iha minutu 77.

Jogu refere dirije hosi árbitru Francisco Pereira, juiz liña Cristóvão Alves, Elísio Reis no árbitru rezerva, Salvador Cabral.

Fó hanoin fali, tabela klasifikasaun provizóriu Grup A, lidera hosi Aitana FC ho pontu 13, segundu lugár Kablaki FC ho pontu 10, terseiru lugár Porto Taibessi ho pontu 10 (Kablaki ho Porto Taibessi pontu hanesan maibé diferente golu), kuartu lugár FIEL ho pontu 4, kintu lugár Cacusan FC ho pontu 1, sestu lugár Zebra FC ho pontu zero.

Iha jogu ikus, Zebra Baucau sei joga hasoru Cacusan Becora ne’ebé sei hala’o iha semana oin. Ekipa rua sei hadau malu sé mak sei mantein iha Segunda Divizaun no sé mak sei tún ba Terseira Divizaun.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here