Plenária Parlamentu Nasionál. Imajen/António Gonçalves

DILI, 24 juñu 2019 (TATOLI)Parlamentu Nasionál (PN) liuhusi sesaun plenária iha segunda ne’e, fó votu pezár ho unanimidade a-favór 43 no presta omenájen ba Antigu Deputadu Asembleia Konstituente no Deputadu Lejizlatura dahuluk hosi Bankada Partidu Demokrátiku (PD), Paulo Alves Sarmento, ho naran kódiku Tuber Loke Dalan “Tuloda”.

Antigu deputadu ne’e, hakotu iis iha loron 15 juñu 2019 iha Dili ho idade 62. Paulo Alves Sarmento Tuloda moris iha Aldeia Rasio, Suku Aitenua, Postu Administrativu Turiscai, Munisípiu Manufahi, iha loron 6 fevereiru 2057, oan hosi Luís Alves Sarmento no Teresa Sarmento.

“Reunidu iha sesaun plenária, Parlamentu Nasionál espresa ninia pezár ba falesimentu Paulo Alves Sarmento ‘Tuloda’ no aprezenta sentidu kondolénsia ba espoza, oan no família en-lutada sira,” deklara PN liuhusi Sekretária Meza, Maria Terezinha Viegas.

Tuir PN, Tuloda dedika ninia vida ba luta libertasaun nasionál no dezempeña papél determinante iha Organizasaun Rede Klandestina.

Entre agustu 1975 no janeiru 1979, sai hanesan kolaboradór Komité Zona Turiscai setór sentru súl.

Entre 14 janeiru 1979 to’o 31 marsu 1987, desterradu iha Illa Ataúro no 1 abríl 1987 to’o 1 outubru 1999, detidu iha Satuan Tugas Intelijen (SGI) iha Dili.

Eleitu hanesan Deputadu Asembleia Konstituente entre 30 agustu 2001 hosi Partidu Demokrátiku no partisipa iha aprovasaun Konstituisaun Repúblika Demokrátika Timor-Leste (RDTL) no Deputadu Parlamentu Nasionál durante lejizlatura dahuluk 2002 to’o 2007.

Iha tinan 2006, hetan kondekorasaun Medalla Onra Órden Nicolau Lobato Grau I, tanba dedikasaun luta ba libertasaun nasionál Timor-Leste.

Deputadu Bankada PD, Mariano Assanami Sabino hateten eis deputadu ne’e marese duni tanba nia kontribuisaun ba libertasaun nasionál.

“Ita hotu fó omenájen no votu pezár ba eis deputadu Paulo Alves Sarmento ‘Tuloda’ tanba nia marese duni,” nia tenik.

Aleinde ne’e, Xefe Bankada Partidu Kongresu Nasionál Rekonstrusaun Timor (CNRT-sigla portugés), Duarte Nunes hateten nu’udar eis-membru Asembleia Konstituente no eis-titulár, Tuloda rai hela eransa murak lubuk-ida, inklui foti parte ativu iha diskusaun no hakerek Konstituisaun RDTL hodi sai ona aliserse própria ba Timor-Leste hanesan nasaun independente ida.

Nune’e mós, nia akresenta, Tuloda hatudu ninia dedikasaun tomak ba luta Ukun Rasik-Án, pensamentu firmi no dedika-án hodi konstrui Estadu no sosiedade Timor-Leste di’ak liu.

“Ita-hotu sempre fiar ba ninia dedikasaun no kontribuisaun tomak ba rai ida ne’e. Timoroan tomak iha obrigasaun atu kontinua kompleta saudozu nia mehi hodi liberta povu hosi ki’ak no mukit,” Nunes informa.

Entretantu, Deputadu Bankada FRETILIN, Fabião Oliveira haktuir saudozu Tuloda aleinde líder importante ida iha frente klandestina, nia mós enkarna valór no prinsípiu serbisu klandestina nian iha ninia moris rasik no halo dedikasaun totál ba liafuan matadalan ne’ebé FRETILIN fó ba timoroan nasionalista sira hotu; “Libertar a Pátria, Libertar o Povo”.

“Nia dedika nia-an tomak atu liberta pátria, maibé bainhira pátria liberta tiha, nia la ba deskansa iha uma ka ezije Estadu atu tau-matan ba nia. Saudozu Tuloda kontinua nia misaun atu liberta povu hosi ki’ak no mukit. Misaun murak ida ne’e duni mak lori nia ba hamutuk ho ninia kompañeiru lubuk ida harii Partidu Demokrátiku no ikus mai ba hala’o serbisu iha Asembleia Konstituente no Parlamentu Nasionál, hodi kontinua kontribui iha prosesu dezenvolvimentu Timor-Leste nian hafoin ukun rasik-án,” nia haklaken.

Jornalista: Julia Chatarina

Editór: Xisto Freitas

Lee mós notísia ida ne’e: http://www.tatoli.tl/2019/06/prezidente-republika-presta-omanajen-ba-saudozu-tuloda/

HAKEREK NO HATÁN

Please enter your comment!
Please enter your name here