Diretór Jerál Turizmu, José Filipe Dias Quintas. Imajen Egas Cristovão

DILI, 24 juñu 2019 (TATOLI)—“Iha eventu espozisaun mundiál Dubai 2020 ne’e, ita sei foka liu mós ba kultura. Oinsá para ita promove ita-nia identidade Timor-Leste (TL) nian ne’ebé liga mós ba ita-nia kultura no ita-nia istória tanba ema presiza hatene,” dehan Koordenadór Jerál Expo Dubai 2020, José Filipe Dias Quintas, ba Agência TATOLI liuhusi entrevista iha ninia kna’ar fatin, Ministériu Turizmu, Faról, Dili, segunda (24/6/2019).

Ezemplu, nia hatutan, ko’alia kona-ba tasi no ko’alia kona-ba foho, nasaun hotu-hotu iha foho no tasi, maibé se ko’alia kona-ba kultura mak sei fó diferensa ho mundu seluk. Hanesan ezemplu, uma-lulik ka uma lisan hosi Lospalos nian, buka iha nasaun hotu-hotu laiha. Só Timor-Leste mak iha. Tanba ne’e, presiza aprezenta iha espozisaun no aprezenta mós istória luta ba ukun rasik-án nian.

“Ko’alia kona-ba ita-nia kultura no ita-nia fatin istóriku sira ne’e, ita-nia paviliaun rasik ne’e sei refleta ita-nia kultura no istória ba ukun rasik-án ne’e. Tékniku sira halo hela dezeñu no hein hela desizaun para oinsá ita-nia paviliaun ne’e rasik, ema kuandu tama ninia karáter ne’e úniku no ema bele husu, ne’e kultura hosi ne’ebé,” Quintas esplika.

Aleinde ida ne’e, nia informa, aprezentasaun ida maka kona-ba logo ka marka turizmu Timor-Leste nian ne’ebé Konsellu Ministru aprova ona iha 2017. Marka turizmu ne’e mak ‘Timor-Leste Explore The Undiscovered’. Se haree didi’ak marka Timor-Leste Explore The Undiscovered ne’e, atu dada ema mai haree Timor-Leste tanba Timor-Leste hanesan distiñu turístiku ida foun atrai ema hodi mai haree.

Entretantu, José Filipe esplika, hosi perspetiva Ministériu Turizmu haree katak vantajen hosi espozisaun ne’e mak hatudu nafatin imajen Timor-Leste nu’udar nasaun ida ne’ebé hakmatek. Vantajen seluk, tuir nia, oinsá dada investedór sira mai investe iha Timor-Leste iha area oioin.

Nia dehan, liuhusi espozisaun mundiál Dubai 2020 ne’e, bele promove produtu lokál sira liliu produtu agríkola ne’ebé orgániku hanesan kafé. Promove kafé tanba kafé sai hanesan identidade Timor nian. Tanba kafé Timor ne’e úniku no orgániku tanba ninia kualidade di’ak liu kafé seluk iha mundu rai klaran.

Iha espozisaun Dubai 2020 ne’e, nia hateten, Timor-Leste tenke promove nafatin kafé no produtu agríkola seluk mak hanesan kamii no produtu seluk ne’ebé orgániku. Tanba, tuir nia, buat sira orgániku ne’e mak Timor-Leste bele kompete ho nasaun seluk.

Tuir planu, ezibisaun mundiál Dubai 2020 ne’e, sei hala’o hosi loron 20 outubru 2020 to’o loron 21 abríl 2021. Antes ne’e, Timor-Leste tuir ona espoziasaun mundiál iha Milano, Itália, iha tinan 2015 no espozisaun mundiál iha Shanghai, Xina, iha tinan 2011.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here