Fundadór Xanana Reading Room Dili, Kay Rala Xanana Gusmão, rei patrosinadór nia liman ne'ebé fó apoiu fundus ba Fundasaun ALOLA-HALIKU iha El Legendario, Lecidere, Dili, Kinta (20/06/2019), hosi tulun inan feton sira ne'ebé sofre kankru serviks. Imajen/Eugénio Pereira

DILI, 24 juñu 2019 (TATOLI)–Prezidente Comissão Nacionál de Eleições (CNE), Alcino Barris ho nia estrutura, ohin, aprezenta relatóriu no progresu servisu kona-ba atividade  eleisaun parlamentár 2018 ba Prezidente Repúblika, Francisco Guterres Lú Olo.

“Ami informa kona-ba ami nia progresu ba atividade eleisaun antesipada ikus liu ne’ebé ami konklui ona,”  informa Alcino Barris ba jornalista sira hafoin audiénsia Prezidente Repúblika iha Palásiu Prezidensiál, Dili.

Iha relatóriu CNE nian totál votu ne’ebé konfirmadu ba partidu Aliansa Mudansa ba Progresu (AMP) hetan votu hamutuk 309.663 (49,6%), partidu Frente Revolusionáriu Timor-Leste Independente (FRETILIN) ho votu 213.324 (34,2%), Partidu Demokrátiku (PD) ho votu 50.370 (8,1%), partidu Frente Dezenvolvimentu Demokrátiku (FDD) hetan votu 34.301 (5,5), Partidu Esperansa Pátria (PEP) ho votu 5.060 (0,8%), Partidu Movimentu Dezenvolvimentu Nasionál (MDN) ho votu 4.494 (0,7%), Partidu Republikanu (PR) ho votu 4.125 (0,7), Movimentu Sosiál Demokrata (MSD) ho votu 3.188 (0,5%), ho totál votu 624.525.

Nune’e, distribuisaun kadeira ba partidu ka koligasaun partidária mak partidu AMP hetan kadeira 34, FRETILIN ho kadeira 23, PD ho kadeira 5 no FDD kadeira 3.

Entretantu, totál eleitór iha eleisaun antesipada parlamentár ne’ebé rejistadu hamutuk 784.286, feto hamutuk 308.844 (48,63%) no mane 326.272 (51,37%).

Iha enkontru ne’e  CNE aprezenta ba Prezidente Repúblika  kona-ba CNE kontinua hala’o atividade servisu alokasaun orsamentu ba partidu polítiku sira ne’ebé hetan asentu iha Parlamentu Nasionál.

CNE mós sei halo auditoria ba alokasaun orsamentu ne’ebé partidu polítiku sira ezekuta tuir duni programa ka lae.

“CNE halo mós servisu alokasaun orsamentu ba partidu polítiku sira halo auditoria nafatin ba orsamentu subvensaun públiku ba partidu polítiku sira ne’ebé hetan asentu iha Parlamentu Nasionál,”  hateten Alcino Barris.

Tuir lei ba partidu polítiku sira ne’ebé hetan orsamentu tenke hato’o mós relatóriu ezekusaun orsamentu ba CNE. Tanba orsamentu ne’e ezekuta ninia efeitu jurídiku ne’e boot tebes.

Iha tempu besik CNE sei konvida partidu polítiku sira atu partisipa semináriu nasionál ida hodi fó hanoin ba malu oinsá mak partidu polítiku sira kontribui no hato’o relatóriu ba CNE.

 CNE mós aprezenta ba Prezidente Repúblika kona-ba relatóriu peskiza levantamentu dadus ne’ebé CNE hala’o iha territóriu Timor-Leste konklui ona no revee fila fali kona-ba aktu eleitorál durante periodu eleisaun hahú too remata.

Peskiza ne’e CNE halo hodi buka hatene mós partisipasaun povu fó votu ba partidu polítiku sira iha Timor-Leste no iha rai li’ur  hodi CNE halo edukasaun síviku ida di’ak liu tan ba povu ninia partisipasaun importante iha prosesu festa demokrasia ida ho kualidade.

Programa seluk tan ne’ebé CNE halo mak instala Sentru Formasaun ba Dezenvolvimentu Demokrasia  iha Timor-Leste. Sentru ne’e harii atu eduka joven sira nia koñesimentu ba prosesu estasaun polítika hodi partisipa votasaun obrigatóriu.

Prezidente Repúblika, Francisco Guterres Lú Olo agradese ho progresu servisu CNE no kontinua motiva CNE hodi hala’o nafatin ninia servisu ho independente.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here