Ministru Negósius Estranjeirus no Kooperasaun (MNEK), Dionísio da Costa Babo Soares. Imajen/Egas Cristovão

DILI, 24 juñu 2019 (TATOLI)—Autoridade Indonézia nian halo ona  Orden Denunsiasaun  Inkéritu (ODI) ou Surat Perintah Dimulainya Penyidikan (SPDP) ba prosesu kazu kazál timoroan ne’ebé mak detein hela iha polisia Atambua, Provínsia Kupang, Timor Osidentál  (NTT-sigla indonézia).

Autoridade Indonézia, kuarta (29/5/2019), prende kazál timoroan ho inisiál JSP no AS  iha fronteira Mota-Ain, Distritu Belu, bainhira lori droga atu ba fa’an iha Kupang, Timor Osidentál.

Evidénsia ne’ebé autoridade Indonézia foti hosi kazál timoroan ne’e, kompostu husi ai-moruk droga ho musan 4.874 ne’ebé tetu hamutuk 1,861 kilograma.

Liuhusi komunikasaun ne’ebé ekipa Prokuradór Jerál Repúblika (PGR-sigla portugés) Timor-Leste ho ekipa Polisia Investigasaun Kriminál (PNSIK) halo ho autoridade Indonézia no Prokuradór Jerál Repúblika Indonézia, katak, prosesu ba kazál timoroan ne’e komesa ona halo orden denunsiasaun inkéritu.

PJR  José da Costa Ximenes, ohin, iha Palásiu Prezidensiál, informa katak, nia parte   haruka ona ekipa prokuradoria Timor-Leste no ekipa PNSIK ba hasoru malu ona ho autoridade seguransa Indonézia no Prokuradór Jerál Repúblika Indonézia nian hodi diskute kona-ba situasaun kazál timoroan ne’e.

PJR José Ximenes informa katak, kazu kazál timoroan ne’e agora parte Autoridade Indonézia liuhusi BNN (Badan Nakortika Nasional) hahú hala’o ona investigasaun hodi hein prosesu.

 “Ha’u haruka ha’u nia prokuradór ida ho autoridade polisia ida ba hasoru malu ho autoridade polisiál Indonézia nian e sira informa katak, autoridade Indonézia halo ona SPGP (Surat Perintah Dimulainya Peyelidikan) ka Orden Denunsiasaun Inkéritu ne’e hahú ona,”  informa PJR José Ximenes.

Nia hateten, se orden inkéritu ne’e hahú halo nusa?  Bele para bainhira iha situasaun rua; ida bainhira sira hasai SP3 (Surat Perintah Pemberhentian Peyelidikan) karik la iha provas arkiva  tiha.

Hafoin Polisia Indonézia kaptura kazál timoroan iha momentu ne’ebá, loron tuir mai,  iha kinta 30 maiu 2019, ekipa PNSIK mós kaptura sidadaun Filipina  na’in tolu hanesan arguido JB, ho nia kaben M no arguido J.

Iha investigasaun PNSIK haree katak, arguido JB sai  nu’udar na’in ba ai-moruk droga ne’ebé fasilita suspeitu kazál timoroan (JSP no AS)  lori ba Indonézia liuhusi fronteira Mota-Ain.

“Bainhira Indonézia kaer ita nia ema, iha Timor-Leste ita mós kaer sidadaun Filipina ida ho inisiál JB.  Agora daudaun Prokuradór Jerál halo kontaktu ho autoridade sentrál Indonézia nian ne’ebé iha Ministériu Justisa nia okos para atu haree took situasaun sidadaun timoroan na’in rua nian,” hateten PJR José Ximenes.

Antes ne’e, Tribunál Dili iha primeiru julgamentu interrogatóriu hamonu sentensa komarka ba arguido JB nu’udar Diretór Kompañia JVK International Movers hanesan na’in ba ai-moruk droga ne’e.

Arguido JB agora iha hela komarka Becora no tribunál mós fó Termu Identidade Rezidénsia (TIR) ba arguido M no arguido J hodi hein prosesu investigasaun kle’an.

Jornalista      : Eugénio Pereira 

Editór            : Francisco Simões

HAKEREK NO HATÁN

Please enter your comment!
Please enter your name here