DILI, 23 juñu 2019 (TATOLI)—Istória Aileu mai hosi ai-kle’uk. Maibé, Aileu oan sira kuandu xuta bola, bola la semo kle’uk tuir sira nia ai be kle’uk. Bola semo loos mai loos de’it.

Istória ohin loraik hatudu ona iha Estádiu Munisipál Dili. Jogu kontinuasaun Liga Futeból Amadora (LFA) époka 2019, klube hosi Laulara, Aileu, AD SLB Laulara, lori nia kbiit tékniku be iha marka golu tuir duni sira nia matan-fihir (alvu) ba armada Académica FC hosi Universidade Nacional Timor Lorosa’e (UNTL) ne’e.

Hanesan manu Makikit be matan moris no isin moris hadau hahan, jogadór AD SLB Laulara mesak matan moris no lais hadau bola hosi adversáriu. Objetivu ida de’it. Hakarak buka manán no manán.

Infelizmente, iha jogu primeira parte, AD SLB la prodúz golu ruma. Sira halo esforsu atu marka kedas golu iha inísiu maibé armada Académica la fó fatin. Académica sempre sobu sira-nia atiradór (avansadu) ne’ebé sira monta. Hanesan mós Académica. Académica tenta atu marka golu iha inísiu maibé SLB blokeia tutuir sira. Ekipa rua mantein 0-0 iha primeira parte.

Dolar ba segunda parte, Académica laduun antesipa di’ak bola. Tanba ne’e, la to’o minutu ida, jogadór estranjeiru hosi Gana, Bakayoka Ozi, lansa xutu dook ida hosi kampu klaran konsege golu duni hodi muda rezultadu ba 1-0.

Golu ida ne’e, fó espíritu ba ekipa Académica atu hametin sira-nia grandeia. Académica la fó leet ba SLB atu halo asaun livre iha sira-nia grandeia. Aleinde halo defeza be metin, Académica mós loke jogu. Sira mós joga ofensiva atu marka golu.

Académica halo asalta ba gradeia SLB ho rigór tebes. Maski defeza SLB metin hanesan moru berlin, maibé la konsege satan atake be naba-naban hosi adversáriu. Nune’e, iha minutu 83, João Bosco (20), fura duni rede SLB liuhosi bola kabesa ho kalma ne’ebé kanaliza hosi nia amigu Juvenal Boavida (10). Rezultadu sai 1-1.

Rezultadu golu be iha hela pozisaun balansu, halo jogu hetok tensa iha minutu ikus. Falta minutu tolu jogu atu termina, ekipa rua hanoin jogu impata ona. Eh, Maromak Aileu la dukur. Tulun duni Aileu oan sira. Teki-teki, Rivaldo Correia (7) lansa tan golu ikus iha minutu 90+2. Golu nakfilak sai 2-1. Adeus Académica.

Maski lakon dala haat tutuir malu ona, treinadór Académica FC, Muhamad Nico, ho oin midar hateten jogu tenke iha lakon no manán.

“Ida ne’e mak rezultadu jogu. Ami lakon dala haat ona. Ha’u mai kaer Académica foin jogu ba dala rua, maibé ida ne’e jogu,” tenik Nico.

Nico akresenta, derrota ne’ebé nia ekipa hetan tanba fallansu iha parte avansadu ne’ebé bele dehan seidauk di’ak. Tanba ne’e, jogu segunda volta, bainhira klube nafatin fó fiar ba nia entaun nia sei hadi’a di’ak liu-tan liña importante (line up).

Aleinde ne’e, kapitaun AD SLB, Jordão da Silva (29) informa, maski SLB manán maibé nia triste tanba parte defeza sempre halo fallansu ne’ebé maka’as.

“Ami ohin manán maibé ha’u sente triste loos tanba ami-nia defeza halo fallansu maka’as loos. Loloos, ohin ami la sofre golu ida. Komu defeza halo sala, bola golu,” nia haktuir.

Jogu dirije hosi árbitru Nívio Fernandes, juiz liña Romário Tety, Filomeno da Silva no árbitru rezerva, Francisco Pereira.

 Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here