DILI, 21 juñu 2019 (TATOLI)—Jogu kontinuasaun Segunda Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairo Formosa, sesta (21/6), ekipa Nagardjo FC hurlele Lika-Lika FC 5-2.

Hosi vitória ne’ebé Nagardjo hetan lori ekipa refere pontu hanesan ho DIT FC maibé DIT kontinua túr iha primeiru lugár tanba golu ne’ebé prodúz hosi DIT barak liu kompara ho Nagardjo.

 DIT sei iha oportunidade hodi aumenta pontu bainhira halo kompleta nia jogu ikus ho Sporting de Timor ne’ebé sei halo iha semana oin. Hosi jogu refere mak Sporting manán mós sei labele halo buat ida tanba DIT nia golu barak liu kompara ho ekipa lima (5) seluk ne’ebé hamahon-án iha grup B.

Golu Nagardjo hatama hosi jogadór  Thore Kaba iha minutu 15, 33 83 no Bendito Ximenes iha minutu 43, 71. Enkuantu, golu ne’ebé atribui ba Lika-Lika hatama hosi jogadór Andre Sarmento iha minutu 30 no Ezequiel Moniz iha minutu 89.

Jogu dirije hosi árbitru Jaime Gomes, juiz liña Romario Tety, Elizio Lopes no árbitru rezerva, Salvador Cabral.

Entretantu, iha jogu tuir mai, Santa Cruz sei kontra FC Lero hodi hadau malu sé loos mak atu simu billete ba Terseira Divizaun.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here