DILI, 21 juñu 2019 (TATOLI)— Diretór Verifikasaun no Lisensa Liga Futeból Amadora (LFA), José Carvalho, hateten dadaun ne’e LFA prepara ona formuláriu atu fasilita rejistu ba klube hirak ne’ebé hakarak partisipa iha jogu Terseiru Divizaun ne’ebé sei halo fulan hirak tuir mai.

Nia esplika, rejistrasaun ba klube Terseiru Divizaun la halo ba klube kapitál Dili ho razaun tanba maioria klube barak ona hosi Dili mak dadaun ne’e partisipa iha jogu Primeira-Segunda Divizaun LFA.

 “Ohin ba oin ami loke ona rejistrasaun ba klube hirak ne’ebé mak hakarak atu mai rejistu, maibé ami fó oportunidade liu-ba klube hirak ne’ebé mai hosi munisípiu hanesan Bobonaro, Oé-Cusse, Ainaro no seluk-tan,” dehan José Carvalho liuhusi konferénsia ba imprensa ne’ebé hala’o iha Xanana Sport Center, Bairru Formosa, Dili, sesta (21/6).

Entretantu, liuhusi reuniaun extraordináriu ne’ebé ezekutivu Liga Futeból Amadora (LFA) hala’o iha kinta (19/06), desidi jogu Primeira Divizaun primeira volta sei la realiza iha Munisípiu Bobonaro no Baucau. Antes ne’e, kalendáriu LFA desidi jogu primeira volta jornada 5 sei hala’o iha Bobonaro no Baucau.

“Razaun muda oráriu tanba órgaun ezekutivu LFA halo análiza katak, primeiru, infraestrutura iha munisípiu rua ne’e seidauk bele hala’o jogu. Segundu, dalan parte rua nian mós foin halo reabilitasaun. Terseiru, limitasaun orsamentu. Ita agora osan ne’ebé iha la to’o atu asegura jogu iha munisípiu,” dehan Diretór Planeamentu Finansa LFA, Adolmando Soares Amaral.

Aleinde ne’e, iha reuniaun ne’ebé hala’o ko’alia mós kona-ba preparasaun ba jogu Terseiru Divizaun époka 2019 no kongresu LFA ne’ebé sei hala’o tinan ida ne’e nia laran.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here