DILI, 22 juñu 2019 (TATOLI)—Sábadu loraik ne’e, Boavista de Timor kontra AS Ponta Leste iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili.

Durante jogu hirak ne’ebé liu ona, Ponta Leste seidauk lakon dala ida maibé sempre manán. Enkuantu, Boavista impata dala ida, lakon laiha no manán. Tanba ne’e, ekipa rua sei halo jogu ne’ebé bonitu hodi halo rame Estádiu Munisipál Dili.

Treinadór Boavista de Timor, Fabiano José konfesa katak Ponta Leste ekipa ne’ebé forte, tan ne’e difísil tebes ba Boavista atu manán maibé hanesa treinadór nia sei buka meiu oinsá atu bele hadau pontu tolu iha jogu refere.

“Ponta Leste ekipa ida ne’ebé ita bele dehan la’ós fásil. Tanba ne’e, Boavista atu manán sei komplikadu tebes,” tenik Fabiano liuhosi konferénsia ba imprensa ne’ebé hala’o iha Salaun Xanana Sport Center, Bairru Formosa, Dili, sesta (21/06).

Nia hatutan, Boavista dadaun ne’e preparadu atu hasoru klube sé de’it iha LFA tinan ida ne’e. “Ami preparadu atu hasoru jogu sira tuir mai. Klube hotu iha liga Timor nian mesak maka’as de’it,” tenik treinadór ne’e.

Iha fatin hanesan, treinadór AS Ponta Leste, Eduardo Pereira hateten, ho kapasidade mínimu ne’ebé nia iha, fiar katak sira sei hatudu rezultadu di’ak iha jogu kontra Boavista. Eduardo haktuir, hafoin hasoru AD. SLB Laulara iha semana hirak liu-ba kotuk, jogadór balun hetan problema iha ain maibé dadaun ne’e rekopera ona.

“Boavista ekipa ida forte ho treinador ne’ebé profisionál kompara ho ha’u. Hau-nia kapasidade mínimu liu maibé ha’u tenta atu halo estratéjia ne’ebé di’ak atu hatudu jogu,” tenik Eduardo.

Hadau pontu tolu ka lae, Eduardo hatán, minutu 90 iha kampo laran mak sei determina katak sé mak lais hatama golu barak, nia mak sei hadau pontu tolu.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here