DILI, 22 juñu 2019 (TATOLI)—Loromatan sa’e hosi lorosa’e. Ema hotu hein nia naroman atu naroman to’o loromonu maibé Boavista de Timor hapara loromatan nia naroman lakon iha dalan klaran.

Situasaun ida ne’e, monu ba AS Ponta Leste. Klube ida mai hosi rai “Quinamoko” no “Purupale” (Lospalos) ne’e nia ain-kloor kotu iha dalan klaran. Halo nia hakat ba oin hakat ladi’ak. Tesi hosi amigu no adversáriu iha futeból, Boavista de Timor FC.

Treinadór AS Ponta Leste, Eduardo Pereira

Klube ne’ebé foti naran hosi ‘Rejiaun Ponta Leste’ ne’ebé iha tempu rezisténsia sai baze rezisténsia kontra tropa Indonézia iha Lautém ne’e, lakon ho armada Boavista de Timor ho golu 2-1 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, sábadu ne’e.

Derrota ida ne’e, lori AS Ponta Leste tenke mantein nafatin terseiru lugár ho pontu 9 no Boavista de Timor tenke ukun fali Ponta Leste ho pontu 10 iha tabela klasifikasaun provizóriu.

Golu ne’ebé lori Boavista ba vitória atribui hosi jogadór Rafael Marti (9) iha minutu 34 no Danilson Araújo (11) iha minutu 86. Entretantu, golu ida ba AS Ponta Leste marka hosi Ezequiel Smith iha minutu 64.

Ba treinadór AS Ponta Leste, Eduardo Pereira, buat ida lakon ne’e halo laran moras liu, maibé sei halo triste liu-tan se lakon ida ne’e halo ekipa tenke fahe malu namkari. Ne’e labele.

Treinadór Boavista de Timor, Fabiano José

Nia hahí fizolofia simples ida nune’e; “Se o manán, prepara-án atu lakon, no se o lakon, simu derrota ida ne’e ho fuan-boot  no hadau hikas vitória ba iha tempu seluk”.

Eduardo haktuir, tuir loloos, ninia ekipa hadau duni pontu tolu tanba oportunidade barak mak jogadór Ponta Leste hetan maibé labele ezekuta ho di’ak.

“Jogu ohin ne’e ita haree tensaun aas tebes. Iha primeira parte, loloos ami manán maibé ha’u nia jogadór sira laduun uza oportunidade halo di’ak entaun ami la konsege hatama golu,” tenik Eduardo.

Nia haktuir, golu primeiru ne’ebé Boavista hatama liuhosi bola kabesa ne’e tanba liña kordenasaun entre ninia jogadór sira nian mak laduun di’ak no golu ida ikus ne’e liña koordenasaun defeza ho baliza laiha mak akontese golu ikus ne’e.

Enkuantu, treinadór Boavista, Fabiano José agradese ba nia jogadór sira ne’ebé hatudu ona vontade ne’ebé boot hodi susesu hadau tan pontu tolu maski liuhusi jogu ida difísil.

“Ha’u agradese ba jogadór sira ne’ebé iha vontade maka’as, disiplina no hatudu jogu ne’ebé di’ak mak ohin ami bele hetan tan pontu tolu,” Fabiano haklaken.

Iha jogu semana oin, Boavista sei kontra Atlético Ultramar no AS Ponta Leste sei joga hasoru Assalam FC.

Jogu ohin dirije hosi árbitru Pedro Carvalho, juiz liña António Carvalho, Elísio Reis no árbitru rezerva, Salvador Cabral.

Tabela klasifikasaun provizóriu lidera hosi Boavista ho pontu 10, segundu lugár Lalenok ho pontu 9, terseiru lugár Ponta Leste ho pontu 9 (Lalenok ho Ponta Leste pontu hanesan maibé diferente golu), kuartu lugár Assalam ho pontu 7, kintu lugár AD SLB ho pontu 4, sestu lugár Ultramar ho pontu 3, sétimu lugár Karketu ho pontu 1, oitavu lugár Académica FC ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here