DILI, 21 juñu 2019 (TATOLI)-Fundadór Xanana Reading Room Dili, Kay Rala Xanana Gusmão, servisu hamutuk Fundasaun ALOLA, Ha’u Hili Atu Kura (HALIKU) organiza programa angriasaun fundu hodi apoia inan feton Timoroan ne’ebé sofre moras kankru serviks (kankru susun).

Fundadór Xanana Reading Room Dili, Kay Rala Xanana Gusmão, rei patrosinadór nia liman ne’ebé fó apoiu fundus ba Fundasaun ALOLA-HALIKU iha El Legendario, Lecidere, Dili, Kinta (20/06/2019), hodi tulun inan feton sira ne’ebé sofre kankru serviks. Imajen/Eugénio Pereira

Programa angriasaun fundu hala’o liuhusi loke leilaun ba sasán artezanatu sira ne’ebé Xanana iha hanesan pintura klásiku ne’ebé Xanana rasik pinta, fotografia Xanana iha tempu rezisténsia no tua tintu antigu ne’ebé Xanana rai, tais Timor, kaebauk, belak, kini-kin, surik Timor, livru rezisténsia ne’ebé Xanana rasik hakerek no sasán artezanatu seluk tan.

Iha presu leilaun ba sasán hirak ne’e oferese presu diferente, hahú husi presu $50,00 too $10,000.00 ba leten. Prosesu leilaun ne’e Xanana organiza direita hato’o promosaun presu ba bainaka sira ne’ebé partisipa bele halo negosiasaun depende ba valór osan no presu sasán ne’ebé oferta see maka negoseia (tawar) osan boot liu, nia maka manan, hodi rai osan ba programa HALIKU-ALOLA.

Molok atu loke leilaun ba sasán hirak ne’e, Xanana introdús uluk objetivu ho programa angriasaun fundu la’ós atu buka votu ka osan ba ninia interese, maibé buka osan atu ajuda HALIKU- ALOLA hatutan sira nia Programa Saúde Inan no Oan no tulun feto maluk Timór iha área rurál ne’ebé la iha kbiit ka osan atu kura sira nia moras kankru susun no kankru serviks.

“Ne’e la’ós kampaña, maibé husi imi nia ajuda bele tau osan ki’ik liu US$0,50 sentavu ba leten depende imi (bainaka) sira nia osan, atu ita bele halo asaun umana ajuda HALIKU-ALOLA realiza sira nia programa ajuda ita nia feto maluk sira ne’ebé moras kankru,” esklarese Xanana Gusmão, iha ámbitu serimónia angriasaun fundu ne’ebé hala’o iha El-Lengario, Lecidere, Dili, Kinta kalan (20/06/2019).

Xanana konta nia Espoza Kirsty Sword Gusmão mós sobrevivente ba moras kankru serviks no ba hala’o tratamentu saúde iha Austrália too rekupera fila mai Timor-Leste hodi harii HALIKU para halo misaun umana sosializa programa prevensaun ba moras kankru hodi salva vida feto no labarik.

Iha serimónia leilaun, konsege hala’o ho di’ak no bainaka internasionál hanesan korpu diplomátiku, no Organizasaun Naun Governamentál sira barak maka tau osan hodi fó apoiu ba HALIKU-ALOLA.

Iha fatin hanesan, Fundadora ALOLA- HALIKU, Kirsty Sword Gusmão liu husi mensajen gravadu hato’o agradese ba apoiu husi parseiru sira hodi tulun HALIKU ajuda feto no labarik sira prevene aan husi moras kankru avansadu.

“Obrigadu ba partisipasaun ema hotu nian iha kalan kmanek ne’e, obrigadu wain ba Maun Boot Xanana no ekipa HALIKU no kontribuisaun patrosinadór hotu- hotu,” hateten Kirsty.

Diretora Ezekutivu Fundasaun ALOLA-HALIKU, Alzira Reis hato’o agradese ba bainaka hotu ninia apoiu fundus hodi ajuda ALOLA-HALIKU.

“HALIKU nia orsamentu menus tebes, tanba ne’e koordena ho Maun Boot Xanana maka organiza direita fundus angriasaun ne’e hodi ajuda programa HALIKU nian,” dehan Alzira hodi responde Ajénsia TATOLI.

Nia dehan, durante ne’e feto barak sofre moras kankru no mate, tanba falta informasaun kona-ba oinsá atu deteta moras kankru no halo salvasaun ba moras kankru ne’e. Tanba ne’e, HALIKU buka osan hodi ajuda programa sosializasaun no edukasaun informasaun ba maluk feto.

“Ami agradese tebes, tanba kalan ne’e (20/06) ita konsege hetan osan rihun US$50 liu. Ami agradese tebes ba apoiu no kolaborasaun husi entidade tomak,” Alzira agradese.

HALIKU mós hato’o agradese ba Lider Karizmátiku, Kay Rala Xanana Gusmão konsege halibur bainaka importante sira hodi lolo liman ajuda ALOLA-HALIKU.

“Ami hakfodak ho agradese tebes ba Maun Xanana ninia karizma ohin kalan hamutuk ho entidade hotu nia apoiu ba ami,” tenik Alzira.

Ho orsamentu ne’ebé hetan, Alzira hateten, hahú tinan ne’e ba oin sira sei halo programa rua hanesan, hasa’e konxiénsia komunidade kona-ba moras kankru feto no apoiu solidariedade ba sobrevivente ba moras kankru nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here