Kampionatu Nasionál Boxe Amadora 2019 hala’o iha Jináziu Dili, foin lalais ne’e. Imajen espesiál

DILI, 21 juñu 2019 (TATOLI)—Sekretáriu Jerál (Sekjer) Federasaun Boxe Amadór Timor-Leste (FBATL), Custódio Soares da Costa, hateten orsamentu rihun 10 ne’ebé apoia hosi Sekretaria estadu Juventude no Desportu (SEJD) la sufisiente tanba orsamentu ne’e la’ós de’it finánsia de’it eventu, maibé ba nesesidade balun tan.

Custódio haktuir proposta ne’ebé hatama ba Sekretaria Estadu Juventude no Desportu (SEJD) hamutuk rihun $84, maibé aprova de’it rihun 10.

“Ami ho estrutura foun, entaun ami-nia proposta ne’e ami tau rihun $84. To’o iha Sekretáriu Estadu nia liman, sira halo avaliasaun katak orsamentu boot liu depois sira aprova de’it rihun 10 hodi organiza eventu ida ne’e. Iha momentu ne’ebá, ha’u mós la barani foti desizaun simu osan ka la simu. Ha’u fila-fali mak konvoka enkontru ho ha’u-nia estrutura ezekutixu Federasaun Boxe ninian, sira hakarak. Importante mak eventu ne’e la’o,” nia dehan ba ba jornalista sira iha nia kna’ar fatin, Benfica, Dili, ohin, relasiona ho preokupasaun kona-ba boxista sira ne’ebé sai kampiaun iha kompetisaun Boxe hetan de’it prémiu osan $100 mai kraik.

Nia dehan, hafoin halo kalkulasaun ba orsamentu rihun 10 ne’e, bele sufisiente hodi organiza eventu kampionatu nasionál ne’e to’o hotu.

“Orsamentu rihun 10 ne’e ami halo jestaun katak prémiu ba boxista seniór ne’ebé sai primeiru lugár ami atribui $100.00, segundu lugár $ 75.00, terseiru lugár $ 50.00. Ba klase juniór, primeiru lugár simu 75.00, segundu lugár $50.00, terseiru lugár $25.00. Ita ko’alia kona-ba kompetisaun ita presiza luvas boxe no ekipamentu sira seluk mós laiha hotu, entaun orsamentu ne’e ami tenke uza aranja fali ba sasán hirak ne’e maski la preve iha proposta,” nia haktuir.

Nia dehan, orsamentu atu aloka hodi sosa hahán kalan ba komisaun mós laiha no klase kuaze atus rua mak partisipa iha eventu ida ne’e.

Tuir dadus balun ne’ebé Agência TATOLI asesu hosi FBATL, haktuir planu orsamentu kona-ba atividade Kampionatu Nasionál Boxing Timor-Leste mak hanesan materiál ka ekipamentu eskritóriu ba eventu, gastu hamutuk $697.00, gastu aluga karreta ba komisaun organizadora $100.00, gastu transporte asosiasaun ba munisípiu 10 hamutuk $2,032.00, akomodasaun hanesan hela fatin ba asosiasaun munísipiu 10 hamutuk $ 1,000.00.

Asosiasaun hosi munisípiu 10 ne’ebé partisipa mak hanesan Lospalos, Oé-Cusse, Viqueque, Same, Ainaro, Aileu, Ermera, Baucau, Bobonaro no Manatuto.

Prémiu ba Boxista Mane Kampionatu Nasionál 2019 kompostu hosi klase Layang Juniór kilógrama 49, klase Layang Seniór kilógrama 49, klase Terbang Juniór kilógrama 52, klase Terbang Seniór kilógrama 52, klase Bantam Juniór kilógrama 56, klase Bantam Seniór kilógrama 56, klase Juniór kilógrama 60, klase Ringan Seniór kilógrama 60,  klase Walter Ringan Juniór kilógrama 64, klase Walter Seniór kilógrama 64, klase Walter Juniór kilógrama 69, klase Walter Seniór kilógrama 69, klase Menengah Ringan Juniór kilógrama 75, klase Menengah Seniór kilógrama 75, klase Menengah Juniór kilógrama 81, klase Menengah Seniór kilógrama 81. Gastu ba Kampionatu Mane nian hamutuk $ 3,696.00.

Nune’e mos prémiu ba Boxista Feto Kampionatu Nasionál 2019, kompostu hosi klase Layang Juniór kilógrama 48, klase Terbang Juniór kilógrama 51, klase Bantam Juniór kilógrama 54, klase Bulu Juniór kilógrama 57, klase Ringan Juniór kilógrama 60. Gastu ba Kampionatu Feto nian hamutuk $ 905.00.

Total boxista hamutuk 174. Hosi númeru ne’e, klase juniór primeiru lugár iha ema na’in-hitu ho osan $75.00 ba kada boxista, segundu lugár $ 50.00, terseiru lugár $ 25.00. Purtantu Seniór nian, primeiru lugár $ 100.00 ba kada boxista, segundu lugár $ 75.00, terseiru lugár 50.00.

Perdiem ba profisionál  sira mak hanesan Prezidente Komisaun Organizadora, kada loron hetan $5.00 no durante loron 6 hetan $ 30.00, Sekretáriu Komisaun Organizadora hetan $30.00, tezoureiru hetan $ 30.00, protokolu hetan $ 30.00, timer iha ema na’in-rua hetan $ 60.00 durante loron 6, saúde iha ema na’in-rua $120.00 durante  loron 6, kada ema ida hetan $10.00, lojístika iha ema na’in-hitu (7) hetan $ 350.00 durante loron 10, kada ema-ida hetan $ 5.00, konsumsi iha ema na’in-tolu (3) hetan $ 90.00 no hala’o serbisu durante loron 6, kada ema ida hetan $ 5.00.

Nune’e mós Diretór Tékniku hetan $30.00 durante loron 6, jurídiku hetan $30.00, parte disiplinár hetan $ 30.00. Parte arbitrajen no juiz hamutuk na’in-14, kada loron ema ida hetan $ 10.00, soma hamutuk hetan $840.00.

Ba kestaun ida ne’e, Agência Tatoli konfirma ba Sekretáriu Estadu Juventude no Desportu, Nélio Isaac Sarmento maibé la konsege tanba governante ne’e hala’o vizita ba Portugál.

Maibé, tuir Pájina Sekretaria Estadu Juventude no Desportu (SEJD), katak partisipante ba kampionatu ne’ebe realiza hosi 12-19 juñu 2019 ne’e , mai husi klase Boxe Juniór (49 kg -52 kg) no Boxe Seniór (55kg- 56 kg) husi klube boxe hitu (7) hanesan: Klube Boxing Thomas Americo, Klube Boxing SLB , Klube Boxing Rumbia Lahane, Klube Boxing Casa Grande Becora, Klube Boxing Dili Leste, Klube Boxing Mascarenhas no Klube Boxing Colmera.

Atividade refere Federasaun Boxe Amadór Timor Leste(FBATL) hetan apoiu fundu hosi SEJD hamutuk $10,000.00

Sekretáriu Estadu Juventude no Desportu, Nélio Isaac Sarmento, deseju ho susesu estrutura foun Federasaun Boxe Amadora Timor Leste (FBATL) atu dezenvolve aan nu’udar organizasaun hodi kria eventu desportiva iha Timor-Leste.

Jornalista: Evaristo Soares Martins

 Editór: Xisto Freitas

1 KOMENTÁRIU

  1. Osan tiket ho folin $0,50 kada ema ida, durante loron hirak ne’e total hamutuk hira no sei uja oinsa?

    Espera katak prosesu sira ne hanesan referensia ida atu hadiak eventu boxing iha futuru!!!

HAKEREK NO HATÁN

Please enter your comment!
Please enter your name here