Koordenadór Timor Leste Coalition for Education (TLCE), José Monteiro.

DILI, 19 juñu 2019 (TATOLI)—Koordenadór Timor-Leste Coalition for Education (TLCE), José Monteiro, hateten eskola públika sira atu la’o di’ak bainhira jestór kada eskola iha kriatividade.

“Eskola públika sira-nia jestaun eskolár ne’e, jestaun ki’ik balun bele halo, maibé tenke halo tuir padraun ne’ebé mak Ministériu Edukasaun iha. Ba ha’u-nia haree, la’ós tanba kestaun jestaun di’ak ka ladi’ak, maibé falta kriatividade hosi jestór eskola nian”, dehan nia ba Agência TATOLI iha nia kna’ar fatin, Caicoli, kuarta (19/6), relasiona ho eskola públika nia jestaun ladi’ak ne’ebé fó impaktu ba kualidade aprendizajen.

Nia haktuir, eskola públika sira la halo jestaun di’ak tanba laiha lei ida hosi Ministériu Edukasaun hodi fó orientasaun ida ne’ebé loos.

“Laiha lei ida hateten katak imi (profesór) iha kompeténsia hodi halo jestaun rasik iha eskola. Sira la kaer osan. Sira kaer osan konsensaun eskolár no merenda eskolár, maibé merenda eskolár ekipa ketak mak kaer, entaun ida ne’e susar ba eskola públika sira halo jestaun rasik,” José esplika.

Maski nune’e, tuir nia, to’o oras ne’e laiha dadus hatudu jestaun eskola privada sira di’ak liu eskola públiku sira.

“Eskola privadu iha Timor uituan de’it. Eskola Katólika mak barak. Eskola Katólika sira mós hetan subsídiu, subsídiu balun mós ba eskola privadu sira. Sira-nia jestaun di’ak tanba ki’ik-oan no mós iha kondisaun ne’ebé di’ak, tanba mós fundasaun nia eskola,” tenik José.

Jornalista: Evaristo Soares Martins

Editór: Xisto Freitas

Lee mós notísia ne’e: http://www.tatoli.tl/2019/06/kualidade-edukasaun-sai-problema-tanba-prosesu-sivilizasaun-naruk/

HAKEREK NO HATÁN

Please enter your comment!
Please enter your name here