ONGV. Imajen espesiál

DILI, 21 juñu 2019 (TATOLI)-Hospital Nasionál Guido Valadares (ONGV-sigla tetun) sei komemora loron aniversáriu ba dala sanulu resin neen (XVI) iha sesta, 28 juñu 2019. Tanba ne’e, ohin HNGV lansa abertura atividade desportiva ho modalidade oioin iha kampu HNGV hodi komemora aniversáriu ne’e.

“Ohin ne’e atu komemora loron aniversáriu Hospital Guido Valadares ba dala XVI tanba ne’e maka antes to’o iha ne’ebá ita iha atividade oioin, atividade sira ne’e maka hanesan desportu, semináriu no doasaun ran,” informa Prezidente Komisaun Organizadora, Duarte Araújo ba jornalista sira, iha marjen abertura ne’e, iha HNGV, sesta ne’e.

Nia informa mós katak atividade desportiva ne’e envolve de’it funsionáriu sira hotu iha HNGV ne’e, hahú 21 to’o 27. Alende ne’e, iha 25 to’o 27 sei hala’o mós semináriu ba profisionál saúde sira hanesan doutór, enfermeiru no parteira sira husi diretór klíniku.

Tuir prezidente komisaun organizadora ne’e katak selebrasaun ne’e realiza kada tinan no sai ona kultura ida tanba ne’e ba oin hala’o kontinua no presiza buat ruma ne’ebé presiza aumenta bele aumenta tan, nune’e ba futuru la’o di’ak liután.

“Ba oin, ha’u hanoin se iha posibilidade bele envolve mós funsionáriu sira, liuliu hanesan Munisípiu Dili, sira bele mai partisipa iha parte desportu, semináriu no atividade seluk ne’ebé iha atu nune’e bele kria amizade ida di’ak liután, maibé atu hala’o atividade ida, tenke haree mós ba orsamentu, se iha posibilidade sei aplika hanesan ha’u hateten,”  konsidera Diretór Administrasaun no Finansa, ne’ebé sai hanesan prezidente komisaun organizadora ne’e.

Nia hateten, desportu ne’e hala’o atu profisionál saúde sira mós bele trata pasiente sira tanba servisu saúde, liuliu iha ospitál ne’e, fasilidade saúde hothotu tenke hanesan servisu sosiál ne’e sosiál, servisu ida hatudu domin tenke tau domin iha laran. “Ida fali tanba tinan oin ne’e ospitál ne’e sei halo nia tinan ba 17, ne’ebé ha’u hakarak dehan katak atividade hanesan ne’e tinan oin ne’e barak liután”.

Prezidente komisaun ne’e relata mós katak orsamentu ne’ebé uza ba atividade aniversáriu HNGV ne’e hamutuk maizumenus 15.000,00 to’o 16.000,00 no orsamentu ne’e mai husi ospitál rasik no mós parseiru sira hanesan husi loja balun, kompañia ne’ebé kaer projetu iha ospitál no fatin seluk ne’ebé iha ligasaun ho HNGV. Husi fundu ne’ebé mak iha dolár 8000 US$ husi HNGV.

“Pois ami mós husu kontribuisaun ba iha parseiru ba dezenvolvimentu ospitál Guido Valadares, depende ba sira, fó ho sira-nia konsiénsia rasik, tanba sira balu mós halo hela projetu iha ne’e, ne’ebé sira iha nafatin konsiénsia atu kontribui, maibé atuál orsamentu husi parseiru sira totál hamutuk 1.240 US$ no ida ne’e seidauk finál”.

“Nune’e sei hein fila fali kontribuisaun balun sei mai, ha’u sei update (atualiza) tanba ha’u hakarak iha aniversáriu ne’ebé hala’o tenke informa ba públiku atu hatene hotu,” konklui Prezidente Komisaun Organizadora, Duarte Araújo.

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here