Pura Giri Natha Taibessi Dili. Imajen/Egas Cristovão

DILI, 21 juñu 2019 (TATOLI)- Unidade Apoiu Sosiedade Sivíl, Gabinete Primeiru-Ministru (UASC-GPM-sigla portugés) observa konstrusaun Templu Pura Giri Nhata, lokalizadu iha Taibesi, ne’ebé konstrui ho fundu mai husi UASC-GPM antes ne’e no mós IKAYANA.TL (Ikatan Alumni Universitas Udayana), Timor-Leste (TL).

Koordenadór UASC-GPM, Filipe da Costa informa katak fundu ne’ebé aloka ba rekonstrusaun Templu Pura ne’e hamutuk 1.2 millaun no husi totál 700.000,00 haruka husi fundasaun ida hanaran IKAYANA, fundasaun ne’ebé forma husi timoroan sira ne’ebé hakarak revitaliza Pura ne’e hanesan patrimóniu istóriku di’ak ida ne’ebé presiza proteje.

Koordenador Sosiedade Sivil Foun, Filipe da Costa. Imajen/Egas Cristovão

“Tanba ne’e ita fó ona fundu. Husi ne’e, ami mai haree katak atividade la’o di’ak, nune’e prosesu tuir mai maka ami despaxa tan osan restu 30% itál atu projetu ne’e bele  konklui,”  informa Koordenadór Filipe da Costa ba Jornalista sira, hafoin observasaun, iha Templu Pura, Taibesi, sesta (21/06).

Koordenadór ne’e haktuir tan katak projetu refere tuir informasaun husi tékniku konstrusaun sira, sei remata tinan oin iha fulan novembru no dezembru depende mós ba situasaun no kondisaun.

“Kontratu sei to’o tinan oin, fulan novembru ka dezembru bainhira kondisaun la’o di’ak, tanba materiál sira uza hodi konstrui templu ne’e prodús husi Bali tanba ne’e prosesu haruka materiál ne’e mós dalaruma han tempu. Se prosesu hotu la’o di’ak tinan oin bele inaugura ona. Tuir informasaun husi tékniku no observasaun ami nian, konstrusaun 60-80 porsentu ona”.

Iha biban ne’e, koordenadór ne’e ba profisionál komunikasaun sosiál sira akresenta katak rikeza Timór nian ida mak rikeza relijioza tanba ne’e ho rekonstrusaun ba Templu Pura ne’e bele promove toleránsia relijiaun ne’ebé mak di’ak liután.

Nia espera mós katak ho projetu rekonstrusaun ba Templu Pura ne’e, nu’udar Timór nia rikeza ida mak rikeza relijioza tanba ne’e ita tenke kontente. Tuir nia, UASC-GPM observa katak iha Pura ne’e nia oin mós iha kedas kapela ida, nune’e Pura nia funsaun ne’e fatin reza ba relijiaun hindu nian.

Komunidade Hindu balun antes ukun aan no agora mai tan tuir dadus UASC-GPM simu katak ema hamutuk 300 resin. Tanba ne’e ho rekonstrusaun ne’e, koordenadór UASC-GPM hateten katak koko halibur sira hotu iha Pura ne’e.

“Ne’e hanesan toleránsia relijioza maske grupu sira nian sei ki’ik maibé ita iha toleránsia ne’ebé di’ak. Ida ne’e duni maka papel sosiedade sivíl nian atu promove toleránsia relijioza atu halo ita-nia sosiedade iha estabilidade. Nune’e, ami kontente mai haree progresu serbisu ne’ebé maka la’o iha ne’e,” dehan Koordenadór Filipe da Costa.

Enkuantu, João da Costa nu’udar Koordenadór Fundasaun IKAYANA (Ikatan Alumni Universitas Udayana) Timor-Leste haktuir katak rekonstrusaun ba Templu Pura ne’e hetan apoiu orsamentu durante Sestu Governu Konstitusionál, ne’ebé lidera husi Eis-Primeiru-ministru, Rui Maria de Araújo.

“Husi serbisu hamutuk ne’e, IKAYANA Timor-Leste hanoin katak sira ajuda ona ita, entaun saida maka ita atu halo fali ba sira. Nune’e, ami hanoin hasoru primeiru-ministru para iha hanoin ida atu ajuda reabilita sira-nia Pura, no ami hamutuk ho Reitór Universidade UDAYANA konsege ba hasoru Eis-primeiru-Ministru Rui Maria de Araújo no sira, husi tékniku Universitas UDAYANA maka halo proposta hodi renova fali Templu Pura ne’e,” informa João Candido.

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here