Lider Karizmátiku, Kay Rala Xanana Gusmão, hakerek hela mensajen ba estudante sira iha Semináriu Menór Nossa Señora de Fátima Balidi, Dili, Kinta (20/06/2019). Imajen/Eugénio Pereira

DILI, 20 juñu 2019 (TATOLI)- Lider Karizmátiku Timor-Leste nu’udar mós Komandante em Xefe das FALINTIL, Kay Rala Xanana Gusmão, husu ba estudante sira iha Semináriu Menór Nossa Señora de Fátima Balidi, Dili, atu badinas estuda hamutuk estudante Timoroan hotu bele prepara aan sai matenek hodi kaer Timor-Leste hanesan nasaun iha futuru.

Xanana dehan, Timór ukun aan ona, la’ós tempu ba estudante sira atu halimar ka envolve iha problema sira, maibé tempu ba estudante sira lee livru barak, nune’e bele loke sira nia hanoin sai sidadaun ida di’ak atu bele kontribui ninia matenek ba nasaun ninia futuru.

“Imi estuda maka’as ba, tanba aban bairua imi maka sei troka ami atu kaer fali ita nia nasaun ne’e no Timór nia dalan  sei naruk ba oin,” afirma Xanana iha diskursu iha ámbitu selebrasaun misa agradesimentu ba  ninia aniversáriu ba dala- 73 (20 de Juñu 1946-20 Juñu 2019), iha Igreja Semináriu Menór Nossa Señora de Fátima Balde, Dili.

Xanana fó lembra katak, uluk nia sei joven Eskola mós iha Samáriu Dare hamutuk ho padre barak, sira hotu- hotu dedika aan hodi aprende estuda, reza maka’as no dixiplina makas maka hodi fó susesu ba sira nia aan.

Nia dehan, semináriu hanesan eskola vokasaun ida ne’ebé ema hili la’ós atu sai de’it  Nai Lulik, maibé aprende siénsia oin-oin hodi bele kontribui ba buat di’ak ruma.

“Semanáriu hanesan eskola vokasaun ida, eskola formasaun forma ema la’ós atu ba buka servisu de’it. Ne’e lae. Sai ema, sai sidadaun di’ak ida no dixiplina no estuda maka’as,” hateten esi Prezidente Repúblika ne’e.

Iha misa agradesimentu ne’e, Semináriu Menór Nossa Señora de Fátima Balide Dili hato’o agradese ba Xanana tanba bele motiva nafatin atu sai estudante ne’ebé matenek.

Ba estudante sira, Xanana husu atu sai ema di’ak ida, tenke aprende husi ema idak-idak nia hahalok rasik, tanba bainhira ema ida iha hahalok di’ak mak sei sai kultura di’ak iha ninia moris.

“Husi fatin ida ne’e (Semináriu Menór) imi (estudante) sei foti ezemplu di’ak barak ho hahalok di’ak barak ne’ebé imi sei aprende no aplika imi nia moris, sei sai sidadaun ida di’ak duni,” afirma eis Primeiru-Ministru, Xanana Gusmão.

Tuir nia, iha moris hanesan estudante ida nia sempre koko atu sai matenek, la’ós tuur no reza de’it, maibé estudante ida aprende hasoru mós dezafiu oin-oin ne’ebé sei dezafia nia aan sai di’ak liu.

Jornalista   : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here