Lider Karizmátiku, Kay Rala Xanana Gusmão, partisipa misa agradesimentu ba nia aniversariu ba dala-73 iha Semináriu Menór Nossa Señora de Fátima Balidi, Dili, Kinta (20/06/2019). Imajen/Eugénio Pereira

DILI, 20 juñu 2019 (TATOLI)-Lider Karizmátiku Timor-Leste, Kay Rala Xanana Gusmão, hato’o agradesimentu ba família Timoroan hotu ne’ebé  selebra misa agradesimentu ba ninia aniversáriu ba dala 73 (20 Juñu 1946-20 Juñu 2019).

Lider Karizmátiku, Kay Rala Xanana Gusmão, partisipa iha misa agradesimentu ba nia aniversariu ba dala-73 iha Igreja Semináriu Menór Nossa Señora de Fátima Balide, Dili, Kinta (20/6/2019). Imajen/Eugénio Pereira

Eis Prezidente Repúblika  ne’e la husu buat barak husi Timoroan sira iha nia aniversáriu ne’e, maibé husu atu ajuda nia halo servisu hotu- hotu ne’ebé bele fó benefísiu ba Timoroan ohin no timoroan sira aban bainrua nian (futuru jerasaun).

 “Ba amigu hotu- hotu ne’ebé mai, reza ba ha’u nia saúde ho imi nia domin, ha’u nia agradese boot tebe-tebes ba imi, dala ruma orasaun ida husi imi nia fuan laran Maromak sei rona liu, duke ita hasoru malu hakuak malu no fó parabéns ba malu,”  hateten Xanana Gusmão iha ámbitu misa selebrasaun ba ninia aniversáriu iha Igreja Semináriu Menór Nossa Señora de Fátima Balide, Dili.

Xanana hateten, kada tinan ema hotu- hotu selebra tinan sempre husu grasa husi Aman Maromak hodi fó saúde di’ak no matenek nu’udar kbiit ho forsa roman ida ne’ebé Aman Maromak haraik ba ema hotu atu halo karidade ne’ebé di’ak liu  iha ninia moris loro-loron tuir ezemplu ne’ebé Na’i Jesus Kristu hanorin hela ba ema hotu.

“Tinan –tinan ha’u mai (misa) hodi dehan orasaun ida ho grasa, ohin ha’u sa’e too ona Ramelau tutun, tun fali ona ba Atsabe, ohin mós labarik ki’ik ida selebra ninia tinan hanesan ha’u, ha’u la’o liu ona buat barak. Ha’u la husu atu fó vida naruk ba ha’u, maibé ha’u husu tulan ha’u ba atu bele halo servisu ne’ebé ha’u bele halo ba ita rai sei barak no sei naruk ba ita nia oan sira nia futuru,”  Xanana hateten.

Eis Primeiru-Ministru ne’e dehan, dalan ba futuru Timor-Leste sei naruk no hahú ohin ba oin Timoroan sira tenke hamutuk nafatin atu halo buat di’ak ba rai Timór no buat di’ak ba ema idak-idak ninia vida moris iha família, sosiedade no ba nasaun.

Iha fatin hanesan, Padre Angelo Salsinha, ne’ebé prezide misa agradesimentu aniversáriu Xanana nian ne’e hateten, misa agradesimentu nu’udar sinál agradese husi  ema ida nia moris ba Aman Maromak ne’ebé haraik ona bensaun moris hotu ne’ebé nia  hetan  iha ninia vida moris.

Amu Angelo dehan, selebrasaun misa Korpu De Deus mós fó hanoin ba ema hotu katak, Na’i Jesus Kristu halo buat di’ak hotu iha ninia moris hodi hanorin hela ba ema moris tuir fiar atu hadomi malu no tulun malu iha situasaun saida de’it.

“Ezemplu ida ne’e hanesan mós ba Maun Xanana ne’ebé selebra aniversáriu hakat liu ona dezafiu oin-oin iha ninia moris hodi dedika aan tinan barak ho funu maluk h0tu- luta liberta Timór ba independénsia,” hateten Amu Angelo.

“Ita reza nafatin ba Avó Xanana atu Aman Maromak haraik nafatin isin di’ak hodi liberta povu no rai ida ne’e ba oin. Hanesan Jesus halo milagre ho paun no ikan uitoan de’it maibé ho matenek no ulun malirin konsege jere hodi fó han ema rihun lima (5000), katak sitasaun difisil la’ós atu halai sees, maibé tuur ho ulun malirin hodi buka dalan,” dehan Amu Angelo iha nia omilia.

Amu Angelo dehan, Xanana sai nu’udar lider ezemplár no patrimóniu ba Timoroan sira, tanba hasoru dezafiu oin-oin iha ninia vida moris no agradese nafatin ba Aman Maromak.

“Ita lider funu na’in sira hamutuk ho Avó Xanana iha esperiénsia di’ak iha terus no susar sira hamriik hamutuk la soe malu, sira hamutuk hanoin, trasa planu la’o nafatin ba oin too ohin Maun Xanana halo tinan 73. Buat barak ita boot halo ona ba povu no rai ida ne’e. Ita joven sira aprende hodi rona hodi hatene moris hamutuk hanesan ezemplu di’ak ida,” katak Amu Angelo.

Hafoin misa, Xanana hamutuk ho estudante semináriu, padre, madre sira inklui lider partidu polítiku sira selebra aniversáriu iha Jardín Semináriu Balidi.

 Jornalista   : Eugénio Pereira

Editór          : Francisco Simões

HAKEREK NO HATÁN

Please enter your comment!
Please enter your name here