Formadór sira bainhira ko’alia ho formandu sira hosi ajénsia notísia TATOLI, I.P, iha formasaun ba loron da-haat ne’ebé hala’o iha Institutu Formasaun Jornalístika ANTARA, kinta, (20/6). Imajen António Gonçalves

JAKARTA, 20 junu 2019 (TATOLI) – Atu hametin relasaun entre Repúblika Demokratika Timor-Leste (RDTL) ho Repúblika Indonézia iha meiu komunikasaun sosiál, papél ajénsia notísia hosi rai rua importante, nu’udar ajénsia diplomasia.

“Ita-nia papél hanesan ajénsia notísia la’ós kamaan, aléinde jornalistíka puru, ita mós sai ajénsia husi diplomasia nasaun ida-idak nian”, hatete jornalista seniór husi ajénsia notísia Indonézia, ANTARA, Ade Partogi Marboen, iha ámbitu treinamentu ne’ebé mak partisipa husi jornalista Ajénsia Notisioza Timor-Leste, TATOLI, I.P na’in-neen iha Institutu Formasaun Jurnalístika ANTARA (LPJA-sigla iha Indonézia), Jakarta Indonézia, ne’ebé tama ona ba loron da-haat.

Editór ne’ebé tama-sai Timor-Leste no Timor Osidentál iha tempu Indonézia no ukun án ne’e katak, aspeitu oioin  ne’ebé importante atu jornalista ajénsia notísia presiza atu halo hodi hametin relasaun, ezemplu iha área sosiu-kultura, ekonomia, edukasaun, no seluk tan.

“Uluk ha’u entrevista señor Xanana iha Mota-Ain, iha nia deklarasaun ne’ebé di’ak no ha’u la haluha to’o agora mak, ita labele hili viziñu, tanba ne’e maka ita tenke iha relasaun ne’ebé di’ak”, haktuir Marboen.

Timor-Leste no Indonézia liuliu Timór Osidentál (NTT, sigla iha Indonézia) ne’e iha kultura ne’ebé atu hanesan no amizade ne’e mak sai baze ba ajénsia rua ne’e husi aspetu jornalizmu no prátika jornalístika atu hasa’e buat pozitivu atubele esplora.

Foto hamutuk ho formandu sira hafoin formasaun ba loron da-daat nian. Imajen mídia LPJA

Nune’e mós Andi Jauhari, eis-ombudsman redasaun ANTARA no jornalista ne’ebé uluk hala’o mós knaar iha Timor-Leste ne’e dehan isu importante ne’ebé jornalista hosi rai rua presiza atu dezenvolve mak edukasaun, tanba timoroan lubun ne’ebé agora daudaun estuda iha Indonézia, komunidade rai rua ne’ebé hela iha área fronteira ho kultura persida.

Kooperasaun ne’e, Andi Jauhari, nu’udar editór seniór hatutan saida mak ajénsia notísia país rua ne’e halo mak bele hamosu ideia hodi realiza semináriu ka grupu diskusaun.

Jornalista TATOLI, I.P ne’ebé partisipa formasaun hahú loron 17 juñu to’o 2 jullu 2019 mak; Rita Almeida (editora), António Gonçalves (editór imajen), Maria Auxiliadora (jornalista), Agapito dos Santos (jornalista), Jogerjo Guterres (vidiografista) no Antónia Maia Gusmão (jornalista).

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here