Lutadór Timoroan Mixed Martial Arts (MMA), Abro Fernandes. Imajen/Espesiál

DILI, 20 juñu 2019 (TATOLI)—Wainhira ema ida seidauk sente lakon ida-nia moruk, imposível ema ne’e goza vitória ida-nia midar. Midar ka moruk, nia sente moruk hanesan no midar hanesan. Hanesan de’it. Moruk mak halakon midar ida-nia midar. Midar mak sei hamohu moruk ida-nia moruk. Moruk ka midar sei hamoruk ema ida-nia moris no sei hamidar ema ida-nia susesu no futuru.

Nia ema ida ne’ebé simples maibé iha nia moris tomak nia sente duni ona moris ne’e nia moruk ne’ebé hamoruk ona ninia esperansa. Nia ema ida ne’ebé la foti-án tanba nia hetan ona esperiénsia midar ida ne’ebé nia aplika midar sira ne’e iha ninia implementasaun moris loro-loron nian. Nia moris iha Luro, Lospalos, Lautém. Nia naran Abrão Fernandes ne’ebé koñesidu ho naran badak Abro Fernandes.

Abro Fernandes (liman loos) ho eis líder rezisténsia, Kay Rala Xanana Gusmão. Imajen espesiál

Abro Fernandes moris hosi família ne’ebé simples. Ninia inan-aman nu’udar ema agrikultór ida. Tanba nia hadomi tebes desportu ekstrem no serbisu maka’as, nia hetan susesu hanesan fighter iha One Pride Mixed Martial Arts (MMA) iha Indonézia.

Mane isin-badak ho aas 169cm ne’e, moris iha Luro, Lospalos, Lautém, iha loron 02 fulan maiu tinan 1990. Nia hanesan labarik ki’ik-oan seluk ne’ebé otas hanesan nia, Abro gosta halimar no halimar tuir sá mak nia gosta no hakarak. Wainhira, iha biban ida, nia haree filme kongfu Bruce Lee, nia laran monu no nia hetan inspirasaun hosi filme ne’e hodi apriende siénsia arte marsiál ninian.

Hori sei labarik, nia hala’o nia moris tuba-metin ba ninia motto moris nian ne’ebé nia moris banati mak, “Takut akan Tuhan adalah permulaan pengetahuan, ta’uk ba Maromak nu’udar siénsia ida-nia hahú.” Tanba ida ne’e, antes haree filme kongfu Bruce Lee, otodidakmente nia apriende mesa-mesak. Oan dahuluk hosi maun-alin na’in sia (9) ne’e, hahú hasara tuir filme ne’ebé nia haree ne’e. Nia foin apriende arte marsiál ne’ebé loloos ne’e, wainhira nia halo ona otas ka idade tinan ualu (8) ona. Nia hahú apriende uluk liuhusi arte marsiál Silat.

Imajen figther sira

Abro nia viajen apriende Silat ne’e, nia hala’o to’o nia tama iha eskola pre-sekundária. Iha biban ne’ebá kedas, nia aumenta ninia koñesimentu hodi apriende Kempo. Tanba gosta Kempo, nia hala’o ninia treinamentu to’o nia akaba eskola sekundária. Hafoin ne’e, nia desidi husik hela nia knua moris fatin (Lospalos, Timor-Leste), la’o-rai ba rai ba Java-Indonézia. To’o ikus Abro laran-monu no hela iha rai Solo-Java Sentrál-Indonézia iha tinan 2012.

Antes atu tama ba Han Academy, Abro la’o badiu hodi haree no hetan esperiénsia iha Kalimantan no Bali. Iha fatin sira ne’e, nia nafatin hala’o treinamentu hamutuk ho nia kolega sira hodi aumenta ninia matenek no esperiénsia. To’o ikus, iha tinan 2013, Abro desidi atu tama iha Han Figth Academy iha Solo, Java Sentrál, Indonézia.

Durante sai hanesan figther, Abro konsege hetan medalla kampionatu, hanesan Kampionatu Nasionál Muaythai 2014. Iha tinan rua tutuir malu, nia sai kampionatu Kickboxing Lindu Aji Championship iha tinan 2013-2014. Ho bukae (modal) ida ne’e mak halo nia bele tuir One Pride Mixed Martial Arts (MMA) ne’ebé transmiti liuhusi estasaun televizaun privadu “TvOne” iha tinan 2016. Ninia viajen sai kampionatu fásil tebes tanba nia bele manán fighter sira seluk ne’ebé nia hasoru no hili nia sai Kampionatu Nasionál One Pride MMA 2016.

Dadaun ne’e, maski Abro harii ona MMA iha Timor-Leste, Abro hala’o hela preparasaun treinamentu iha Solo-Indonézia hodi ba tuir kompetisaun MMA nian iha Kuala Lumpur-Malázia iha loron 12 fulan jullu tinan 2019 be mai.

“Treinamentu ne’e ba eventu MMA One Championship ne’ebé fulan ida sira halo eventu dala tolu. Eventu ne’e sei realiza iha Sudeste Aziátiku. Ha’u sei ba luta iha Kuala Lumpur, Malázia, iha 12 jullu 2019. Ha’u dedika luta ida ne’e ba Kay Rala Xanana Gusmão no ba povu Timor-Leste tomak. Luta ne’e hodi buka prestasaun (rangking) iha FLYWIGTH ho todan 61,2kg. Iha loron 6 jullu, ha’u sei aranka ba Malázia,” dehan Abro Fernandes ba Agência TATOLI via rede sosiál, kinta (20/6/2019).

Abro dadaun ne’e hala’o treinamentu iha Han Academy no Indogym iha Solo-Java Sentrál-Indonézia ne’ebé uluk lori nia sai kampionatu nasionál MMA iha 2016. Iha fatin ne’e, tuir nia, iha fasilidade kompletu no treinadór ne’ebé kualifikadu. Iha ne’e bele foku liu tanba hetan fee (osan) hosi ninia jestór hodi halo preparasaun ne’ebé la presiza serbisu iha li’ur. Iha ne’e alimentasaun baratu no kompletu. No, tuir planu, nia sei kontinua ninia masteradu desportu nian  iha Solo-Indonézia.

“Loos! Ha’u optimista ba jogu ne’e tenke manán. Tanba ha’u-nia preparasaun di’ak no ha’u estuda di’ak ona ninia jogu, ne’ebé ha’u bele atende nia. Ha’u sei lori nasaun rua nia naran; Timor-Leste no Indonézia. Iha fight ne’e, ami na’in tolu mak lori nasaun rua. Ne’e tanba jogu profisionál entaun bele lori bandeira rua. Ha’u sei kontra ema hosi Índia ho naran Guardarshan Mangat,” dehan Abro, oan dahuluk hosi inan Joaquina Soares no aman Adão Fernandes ne’e.

Abro orgullu tanba bele lori bandeira rua no lori nasaun rua nia naran. “Ha’u lori nasaun Indonézia nia naran tanba ha’u apriende MMA iha Indonézia no sira mak haboot ha’u-nia naran no sira halo promosaun ba eventu mundiál ne’e.  Segundu, ha’u mós labele haluha ha’u-nia rain moris fatin Timor-Leste. Parte seluk, iha Timor-Leste ha’u mak harii MMA ne’e hodi buka timoroan sira ne’ebé iha talentu no ita promove,” Abro hateten.

Ba desportu profisionál ida ne’e, Abro esklarese, ba tuir eventu boot hanesan nia tuir ne’e la’ós hetan tulun orsamentu hosi Governu Timor-Leste ka Indonézia maibé tanba ida ne’e desportu profisionál ne’ebé sei haree liu-ba promotór ka jestór sira mak haree ninia preparasaun.

“Ha’u-nia promotór mak HAN ACADEMY NO INDOGYM ne’ebé na’in ne’e sai ha’u-nia treinadór mós. Ha’u-nia treinadór ne’e naran Johan Mulia Legowo nu’udar treinadór ida ne’ebé kualifikadu no lori nia mak ha’u-nia naran moris One Pride MMA. Luta ida ne’e, dala ida tan, ha’u dedika ba Kay Rala Xanana Gusmão no ba Timor-Leste. Parabéns ba Xanana nia aniversáriu ba dala-73. Lalehan no rai sei hamahon no fó moris naruk ba ita-boot. Susesu nafatin Avó Xanana,” Abro husik hela mensajen ba Xanana.

Jornalista: Cancio Ximenes

Editór: Xisto Freitas

1 KOMENTÁRIU

  1. Maun alin baraun Ami hotu reza no fo suporta atu ita bot bela sai bencedor iha evento ne,maromak no matebian rai lulik Timor sempre aconpanha nafatin maun abraun hodi bele sucesu iha futuru mai JBU🙏

HAKEREK NO HATÁN

Please enter your comment!
Please enter your name here