Imajen dok. Diretór Jerál Arte no Kultura, Manuel Ximenes Smith

DILI, 19 juñu 2019 (TATOLI)Governu liuhusi Sekretaria Estadu Arte no Kultura, ohin, halo levantamentu dadus atu liberta fatin Eis Muzeu Provínsia Timor-Timur iha Comoro tanba VIII Governu Konstitusionál ida ne’e nia polítika hakarak atu utiliza edifisiu refere nu’udar futuru sentru kulturál no mós muzeu nasionál.

Levantamentu ne’e hala’o liuhusi diálogu ho komunidade hamutuk uma-kain 14 ne’ebé okupa fatin refere no mós Grupu Arte Moris sira ne’ebé utiliza fatin ne’e. Grupu Arte Moris sira utiliza fatin refere tanba hetan lisensa hosi Sekretária Estadu Arte no Kultura hosi Primeiru Governu Konstitusionál, Virgílio Smith, fó ba sira utiliza nu’udar fatin formasaun  no fatin edukativu teatru ho pintura sira ka arte-plástiku.

“Iha diólogu ne’e, Governu husu de’it komunidade nia partisipasaun no kontribuisaun másimu atu oinsá liberta fatin ne’e. Tanba hakarak ka lakohi, VIII Governu Konstitusionál ida ne’e mai ho kompeténsia barak tanba Governu nia polítika hakarak atu utiliza edifísiu ne’ebá nu’udar futuru sentru kulturál no mós muzeu nasionál,” dehan Diretór Jerál Arte no Kultura, Manuel Ximenes Smith, ba Agência TATOLI lihusi entrevista iha nia kna’ar fatin, Avenida de Portugal, Dili, ohin.

Nia informa, iha VIII Governu Konstitusionál, liuhusi Minitériu Justisa no Sekretaria Estadu Terra no Propriedade halo ona atribuisaun rai ne’e mai iha Sekretaria Estadu Arte no Kultura iha loron 9 maiu tinan 2019. Signifika, tékniku sira hosi Governu tenke buka ona meiu oinsá atu bele halo diálogu ho komunidade atu liberta fatin ne’e.

Liga ba antes halo diálogu refere, diretór ne’e hatutan, governu ba halo tiha ona levantamentu dadus ne’ebé notifika katak ema sira ne’ebé okupa rai ne’e barak liu estudante sira. Governu halo ona mós levantemaentu tékniku hodi foti medida rai nia luan. Ida ne’e halo kontatu liña ministeriál hanesan Terra no Propriedade, Komandante Eskuadra PNTL Don Aleixo, Xefe Suku Madoi no Xefe Aldeia sira inklui Polísia Komunitária (OPS) sira.

“Objetivu ohin halo diálogu ne’e seidauk halo desizaun balun. Ita foin kria armonizasaun entre governu ho komunidade ne’ebé hela iha ne’ebá no mós governu ho Grupu Arte Moris ne’ebé durante tempu barak okupa fatin ne’e. Mosu lamentasaun barak ne’ebé povu hato’o mak tenke haree kondisaun ruma kona-ba komunidade ne’ebe mak hela iha ne’ebá,” nia informa.

Maibé, Manuel hateten,  Grupu Arte Moris lakohi rezolve problema ne’e hamutuk ho komunidade ne’ebé mak hela iha  ne’ebá tanba sira nia kestaun ketak ida ho komunidade. Komunidade ne’e utiliza fatin refere iha tempu ka situasaun krize polítika militár 2006.

Preokupasaun prinsipál sira hosi komunidade ne’e oinsá, nia hatán, komunidade sira-nia preokupasaun mak tenke kria kondisaun tanba sira mai uma laiha no governu tenke haree uma ba sira hela.

“Kestaun sira hanesan ne’e normál sira ko’alia maibé Sekretaria Estadu Arte no Kultura laiha kompeténsia atu halo desizaun ruma atu fó uma ka sasán tanba liña minsiteriál ida-idak mai ho ninia polítika rasik,” diretór ne’e esplika.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here