Imblema TLCE

DILI, 19 juñu 2019 (TATOLI)—Timor-Leste Coalition for Education (TLCE), sei tama-sai eskola sira iha territóriu nasionál kona-ba prosesu formasaun ne’ebé oras ne’e la’o ona.

TLCE oras ne’e iha ona dadus preliminária kona-ba formasaun edukasaun. Hela de’it Rejiaun Administrativa Espesiál Oé-Cusse Ambeno (RAEOA) no mós Viqueque mak seidauk distribui dadus formasaun ne’e mai.

“Ami sei halo peskiza ba formasaun profesór iha territóriu laran tomak, ho objetivu atu bele identifika formasaun profesór ne’e refleta duni realidade no konsege eleva duni kapasidade profesór sira-nian ka lae no iha ona espasu atu profesór hotu-hotu tuir formasaun ka lae,” Koordenadór TLCE, José Monteiro, ba Agência TATOLI, iha Caicoli, Dili, ohin.

Tuir nia katak formasaun ba profesór ne’e la’o kle’ur ona, tanbasá profesór laiha kualidade nafatin.

“Objetivu ikus mak ita atu avalia rezultadu hosi intervensaun INFORDEPE nian ba formasaun profesór, na’in hira mak liu. Ida liu ne’e ninia kualifikasaun ne’e di’ak duni ka lae, ka tanba tuir hela formasaun entaun fó baxarelatu ka lisensiatura,” José esplika.

Nia hatutan TLCE nia peskiza ne’e mós atu buka hatene profesór sira-nia loguístika, koñesimentu língua portugés, nível koñesimentu pedagójika no dezenvolvimentu pesoál ne’e to’o iha ne’ebé, nune’e intervensaun hosi INFORDEPE ba formasaun profesór ne’e hetan duni benefísiu no atinje meta ne’ebé iha.

“Ita lakohi profesór sira hetan títulu, sein koñesimentu adekuadu, tanba barak liu iha títulu maibé laiha kapasidade. Ita sei konklui relatóriu iha dezembru 2019,” tenik José.

Nia haklaken, profesór iha territóriu nasionál hamutuk rihun-sia no profesór ne’ebé tuir formasaun rihun-tolu resin. Profesór hirak ne’e permanente no balun ho kondisaun kontratadu hela.

“Ami sei tama eskola bázika hamutuk 204 hodi husu kona-ba prosesu tuir formasaun ne’e,” katak nia.

Ikus liu, tuir José, TLCE sei haree rezultadu hosi formasaun ne’e konsistente ka lae, katak profesór sira tuir iha duni kualifikasaun ka lae. Sé profesór sira tuir hela de’it formasaun, maibé laiha kualifikasaun, entaun desizaun saida mak governu bele foti.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here