Prezidente Repúblika, Francisco Guterres Lú Olo, presta omenájen ba saudozu veteranu Paul Alves Sarmento koñesidu ho naran-funu Tuber Loke Dalan ka “Tuloda”. Imajen Mídia PR

DILI, 19 juñu 2019 (TATOLI)—Prezidente Repúblika, Francisco Guterres Lú Olo, presta omenájen ba saudozu veteranu Paul Alves Sarmento koñesidu ho naran-funu Tuber Loke Dalan ka “Tuloda”, iha matebian nia horik fatin, Lahane Osidental, Dili, kuarta (19/6).

Xefe Estadu ne’ebé akompaña hosi Espoza Cidália Lopez Nobre Mouzinho Guterres, Xefe Kaza Sivíl, Francisco Maria de Vasconcelos no funsionáriu Prezidénsia Repúblika, hato’o kondolénsia ba família matebian no fó mós sasin kona-ba matebian Tuloda nia involvimentu durante funu ba Ukun Rasik-Án.

“Ha’u mai hanesan Prezidente Repúblika no hosi sorin mai hanesan mós kompañeiru ba luta saudozu Tuber Loke Dalan nian, hodi presta omenájen ikus liu ba saudozu Tuber Loke Dalan, atu ita hotu hamutuk lori hela nia ba tau iha nia fatin ikus nian,” Xefe Estadu dehan liuhusi Mídia Prezidénsia Repúblika ne’ebé Agência Tatoli asesu, kuarta (19/6).

Saudozu veteranu Paul Alves Sarmento “Tuloda”. Imajen Mídia PR

“Ami hakarak manifesta, hato’o sentida kondolénsia ba família sira hotu ne’ebé sente lakon-boot ida, oan-doben, aman-doben ida, avó ida ne’ebé laiha ona iha ita hotu nia leet. Ami hakarak solidariza liu hosi ami-nia liafuan prezensa ida ne’e katak Prezidente Repúblika no kompañeiru ba luta Tuber Loke Dalan ninian, ha’u rasik, Lú Olo, sente triste hanesan mós família rasik, oan ho familia rasik sente,” nia haklaken.

Lú Olo haktuir, Tuber Loke Dalan halo nia vida tomak sai kombatente ba kauza nasionál ida. Kauza Libertasaun Nasionál ka ba independénsia Timor nian. Nia prova hosi buat barak. Ninia kapasidade rasik ho nia matenek rasik atu bele halo buat hotu hodi partisipa iha rezisténsia ida naruk, susar no ho folin-boot maibé nia aseita para atu bele halo.

Hosi fali sorin, tuir Prezidente, Tuber Loke Dalan bainhira nia halo rezisténsia ida ne’e, nia kria mós ka nia harii mós redi-boot ida ne’ebé dezde hosi lorosa’e hodi ba to’o iha fronteira, to’o iha loromunu. Nia halo redi-boot ida no nia hakuak ema hotu. Nia maluk sira hotu ne’ebé hala’o kna’ar hosi klandestinidade para bele hamutuk halo forsa ida de’it hodi luta iha frente klandestina nia laran.

Nia hatutan, Tuber Loke Dalan mós la hanoin katak sira mesak de’it maka bele halo funu maibé nia sente katak presiza tenki iha ligasaun mós ho sira seluk. Tuber Loke Dalan loke ninia via (dalan) iha fatin hotu-hotu ba rezisténsia armada. Fó informasaun, fó ai-han, fó buat hotu-hotu ne’ebé mak iha rezisténsia armada presiza para bele moris.

“Tuber Loke Dalan kombatente ida kauza nasionál maibé nia mós ema ida ne’ebé hatene hakuak ema hotu. Hosi fali sorin, Tuber Loke Dalan nia matan la haree to’o maibé nia tilun to’o, hodi loke via mós ba iha frente polítiku-diplomátiku nian hodi hato’o informasaun barak ne’ebé hosi ami, liuhosi nia hodi hato’o liu ba tasi-balu para informa ba mundu katak povu ida ne’e hakarak Ukun Rasik-Án,” tenik Lú Olo.

Aleinde ne’e, nia informa, Prezidente Repúblika mai iha família sira hotu nia oin, atu husik hela Estadu nia rekoñesimentu boot teb-tebes , Estadu ninia orgullu, ninia ónra-boot teb-tebes ba saudozu Tuber Loke Dalan ne’ebé sei toba hela iha ne’e.

“Ikusliu, ami hakarak hato’o katak Prezidente Repúblika maka iha kompeténsia rasik atu bele tau nia kompañeiru ba luta sira ne’e hotu iha nia fatin.Tanba ne’e maka ha’u-nia dekretu Prezidensiál sai tiha ona para lori Tuber Loke Dalan tau ba nia fatin ikus iha Jardim dos Herois, Metinaro,” Lú Olo afirma.

“Rekoñesimentu ida seluk tan ne’ebé maka Estadu sei halo, ha’u hateten hela ba maluk sira hotu, ba família sira liliu, katak bainhira to’o iha loron-boot, Prezidente Repúblika, ha’u rasik, sei hamutuk ho família atu husik hela tan sasin ida ba nia moris liuhosi madalla ida ne’ebé Estadu sei atribui ba nia,” nia dehan.

Matebian Paulo Alves Sarmento Tuloda mate ho idade 62, tanba sofre moras ran-midar, iha loron-15 fulan ne’e. Nia husik hela feen no oan feto ida no mane lima.

Tuloda moris iha 6 fevereiru 1957, iha Aldeia Laclo, Suku Aitemua, Postu Administrativu Turiscai, Munisípiu Manufahi.

Nia partisipasaun iha funu ba independénsia hahú iha agustu 1975. Iha mós kna’ar sira ne’ebé nia asumi durante periodu rezisténsia, entre sira seluk, maka hanesan Kolaboradór zona 3 Comite Central FRETILIN hosi 1975 to’o 1979, Sekretáriu Rejiaun I FPI no selu-ktan. Tuloda sai mós hanesan membru Asembleia Konstituinte no Deputadu Parlamentu Nasionál hosi partidu ne’ebé nia mós tulun hodi harii, Partidu Demokrátiku, hafoin Timor Leste restaura nia independénsia iha 20 maiu 2002.

Mate-isin matebian Tuloda, haloot ona iha Jardim dos Herois Metinaro, Díli, 19 maiu 2019.

Edisaun: Xisto Freitas

HAKEREK NO HATÁN

Please enter your comment!
Please enter your name here