Xefe Estadu Maiór Jenerál F-FDTL, Lere Anan Timur hala’o enkontru semanál ho Prezidente Repúblika, Francisco Guterres Lú Olo, foin lalais ne’e. Imajen Tatoli/António Gonçalves

DILI, 19 juñu 2019 (TATOLI)—Prezidente Repúblika, Francisco Guterres Lú Olo, dekreta kontinuidade mandatu ba Majór Jenerál Lere Anan Timur, nu’udar Xefe Estadu Maiór-Jenerál FALINTIL-Forsa Defeza Timor-Leste (F-FDTL), liuhusi Dekretu Prezidensiál ne’ebé publika iha 14 juñu 2019, Serie I,  númeru 23 A, hahú sura hosi 6 outubru 2018.

Molok mandatu Xefe Estadu Maiór-Jenerál Lere Anan Timur ramata iha 6 outubru 2018, Prezidente Repúblika konsulta ho Konsellu Superiór Defeza no Seguransa hodi rona hanoin hosi ninian membru sira.

Tuir komunikadu imprensa ne’ebé Agência Tatoli asesu hosi Mídia Prezidénsia Repúblika iha kuarta ne’e haktuir, iha reuniaun Konsellu Superiór Defeza no Seguransa, membru sira, inklui Primeiru-Ministru Taur Matan Ruak, fó fiar ba Prezidente Repúblika atu desidi.

Prezidente Repúblika respeitu ezersísiu korrente mandatu Xefe Estadu Maiór-Jenerál no ba interese unidade militár Estadu no funsionamentu regulár instituisaun militár, modernizasaun no dezenvolvimentu institusionál nian dekreta kontinuidade mandatu.

Hafoin mandatu Majór Jenerál Lere Anan Timur ramata tinan rua nian (2015-2017), nu’udar Komandante Superiór Forsa Armada, Prezidente Republika renova ninia mandatu hosi 6 outubru 2017 to’o 6 outubru 2018.

Edisaun: Xisto Freitas

HAKEREK NO HATÁN

Please enter your comment!
Please enter your name here