Ilustrasaun

DILI, 19 juñu 2019 (TATOLI) – Ministru Estadu Prezidénsia Konsellu-Ministru no Ministru Planeamentu no Investimentu Estratéjiku ein ezersísiu, Hermenegildo Augusto Cabral Pereira, iha segunda ne’e, lidera reuniaun ida ho responsável sira iha área infraestrutura hodi halo avaliasaun ba pontu situasaun prosesu relasiona ho projetu infraestrutura 143 pendente, molok lori ba Konsellu-Ministru hodi deside.

Responsável hirak ne’e mai husi Komisaun Nasionál Aprovizionamentu (KNA-sigla portugés), Ajénsia Dezenvolvimentu Nasionál (ADN), Sekretariadu dos Grandes Projetus (SGP) no reprezentante husi Prezidénsia Konsellu-Ministru (PCM-sigla portugés) no mós Ministru Planeamentu no Investimentu Estratéjiku (MPIE).

Relasiona ho projetu 143, Governu konsidera obra infraestrutura hirak ne’e ho karakter urjente, ne’ebé fó resposta ba situasaun emerjénsia hanesan dezastre naturál no nesesidade adisionál ba projetu ne’ebé antes ne’e iha ona.

Tuir nota komunikadu husi Governu, nesesidade projetu hirak ne’e identifikadu ona husi Ministériu Obras Públika, Transporte no Komunikasaun (MOPTK) husi VI Governu Konstitusionál ne’ebé manda ona prosesu pré-análize ba Konsellu Administrasaun Fundu Infraestrutura (CAFI-sigla portugés) no verifika ona husi parte ADN no ikus mai konfirma no aprova husi CAFI. Nune’e, orsamentu ba projetu hirak ne’e tama no aprova ona iha Parlamentu Nasionál iha Orsamentu Jerál Estadu (OJE) 2018.

Liu-hosi enkontru ne’e iha ona orientasaun hodi instituisaun governamentál bele prepara relatóriu integradu inklui diskrisaun ba nesesidade sirkunstánsia ne’ebé kondús ezekusaun projetu no pontu situasaun ida-idak.

“Nune’e prosesu ne’e bele análiza husi Konsellu-Ministru no rezolve ho seriedade posivel, forma saida mak Estadu bele kumpre bazeia ba obrigasaun ne’ebé estabelese ona no kumpre objetivu Planu Estratéjiku Dezenvolvimentu Nasionál (PEDN) 2011 to’o 2030 no programa VIII Governu atu apoia empreza nasionál ho vista dezenvolvimentu ekonómiku nasionál, promosaun empregu no kapasitasaun setór privadu nasionál,” refere nota husi Governu ne’e.

Reuniaun ne’e partisipa husi Diretór-Jerál ADN, Samuel Marçal, Diretór Jerál CNA, Aniceto do Rosário, Koordenadór SGP, Krispim Fernandes no eis membru Governu hanesan Gastão de Sousa, Pedro Lay, Santina Viegas Cardoso no mós Diretór Nasionál no Asesór Jurídiku husi PCM no MPIE.

Antes Komisaun Inkéritu Parlamentár (KIP) ne’ebé forma husi Parlamentu Nasionál (PN) konsege finaliza relatóriu kona-ba projetu 143 ho montante millaun $345 ne’ebé aprovadu husi CAFI iha loron 19 jullu 2019, maibé relatóriu ne’e konsideradu nulu tanba la-hetan aprovasaun iha komisaun no la-lori ba plenária hodi debate, enkuantu Governu hein rekomendasaun husi KIP.

Ministru Obras Públika, Salvador Eugénio Soares dos Reis Pires, antes ne’e, informa katak entre projetu 143, projetu 45 mak laiha kontratu, maibé iha dezembru 2018 husi projetu 45 ne’e aprova ona projetu hamutuk 15 tanba haree ba projetu ho karater urjénsia, ne’ebé aprezenta husi ADN, ADN no CAFI enkuantu seluk hein rekomendasaun husi KIP.

Haktuir iha Livru 3 Fundu Infraestrutura tinan 2019, programa ba estrada konsidera hanesan programa estratéjiku ne’ebé importante tebes ba dezenvolvimentu infraestrutura, tanba ne’e karteira ba programa estrada kontein ona 336 projetu ne’ebé soma husi projetu adisionál hamutuk 135, inklui 144 projetu ne’ebé aprovadu iha CAFI iha tinan 2017.

Atuál eziste 172 projetu foun iha tinan 2019 hamutuk (37+135), projetu 181 konklui ona no 118 projetu ein kursu. Alokasaun orsamentu ba programa estrada iha tinan 2019 hamutuk millaun $127,532.

Enkuantu alokasaun orsamentu ba tinan 2019 ba Fundu Infraestrutura hamutuk millaun $367,506, inklui millaun $280,506 ba projetu Fundu Infraestrutura no millaun $87 ba projetu husi empréstimu.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here