Prezidente CDN-CNRT,, Dionísio da Costa Babo Soares. Imajen/António Gonçalves.

DILI, 19 juñu 2019 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares,  informa,  Governu sei buka advogadu sira hosi Ministériu Públiku Timor-Leste atu próteze  kazál timoroan  ne’ebé detidu hela iha autoridade Indonézia nia liman.

Autoridade Servisu Migrasaun Indonézia nian prende kazál timoroan ho inisiál JPS no AS ne’e iha Mota-Ain, Distritu Belu, Provínsia Kupang, Timor Osidentál (NTT-sigla indonézia), foin lalais ne’e, tanba  lori droga hosi fronteira terrestre Timor-Leste nian atu ba fa’an iha Kupang.

Ministru Dionísio Babo hateten, Governu sei koordena mós ho família hodi haree tanba ne’e kestaun individual, maibé hanesan Timoroan hanesan nasaun Governu Timor-Leste mós tenke fó atensaun. Estadu nia devér akompaña atu bele haree, hodi garante protesaun direitu sira na’in rua nian.

“Ha’u informa ona ba primeiru-ministru kona-ba situasaun ne’e, bainhira iha ona informasaun kona-ba kompleta faktu (penyidikan) ne’e remata maka sira haruka ba Ministériu Públiku ba iha ne’ebá. Hafoin ne’e sira haree fila fali kazu ne’e bele halo akuzasaun ou lae,” esplika Ministru Dionísio Babo, ohin, ba Ajénsia TATOLI.

Nia dehan, Governu Timor-Leste liuhosi Embaixada iha Jakarta no Konsuladu Jerál iha Kupang hamutuk ho Ajénsia Konsulár iha Atambua servisu hamutuk akompaña hela prosesu hosi kazu  ne’e.

“Agora sira sei iha hela prosesu penyidikan ka investigasaun judisiál hosi autoridade sira iha ne’ebá. Depois ho buat sira ne’e hotu maka orasida sira sei estabelese faktu, katak sasán sira ne’e sira nian ka, ema maka fó sira lori ka, ou sira inosente maka ema entrega ba sira kaer de’it. Hafoin ne’e sira haree bele halo akuzasaun tuir prosesu normál iha tribunál nian, ne’ebé ita nia Embaixada iha Jakarta, ita mós iha konsuladu jerál ida iha Kupang, ita mós iha Ajénsia Konsulár iha Atambua, sira na’in tolu agora akompaña hela,” hateten Dionísio Babo.

Foin lalais ne’e mós Tribunál Dili hamonu sentensa prizaun preventiva  ba arguido JB nu’udar Diretór Kompañia JVK International Movers hanesan na’in ba ai-moruk droga ne’ebé fasilita JPS ho nia kaben AS nu’udar nia traballadór atu lori tama ba Kupang, Indonézia.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here