DILI, 19 juñu 2019 (TATOLI)—Kuarta lorokraik ohin, 19  juñu 2019, iha Kampu Demokrasia, Bairru Formosa, Dili, tuku 16.00, sei hala’o jogu ikus entre Kablaki FC no Aitana FC ba jogu kontinuasaun Segunda Divizaun Liga Futeból Amadora (LFA) époka 2019.

Minutu 90 mak sei determina ekipa rua ne’e sé loos mak sei hetan billete hodi promovidu ba iha Primeira Divizaun époka 2020. Maski nune’e, Aitana presiza impata de’it atu lori nia túr iha Primeira Divizaun.

Entretantu, hosi jogu 4 ne’ebé mak Armada Ventura ne’e hakat-liu, kolleta ona pontu 10, seidauk lakon, manán iha jogu tolu no impata jogu ida. Haree ba produtividade ekipa refere mós labele haree ho matan sorin. Hosi jogu haat ne’ebé mak hala’o ona, Armada Ventura prodúz ona golu 13 no sofre golu 6.

 Iha sorin seluk, Aitana FC mós la’ós ekipa ne’ebé fásilmente atu kualker ekipa ida hatuun. Aitana iha nia istória rasik hanesan kampiaun ba Kopa 12 novembru tinan 2015 no konsege mós sai membru Primeira Divizaun iha époka 2016.

Aleinde ne’e, maioria jogadór ekipa refere bele dehan iha esperiénsia másimu ona iha kampu futeból 11, ne’ebé jogadór na’in hirak ne’e mós konsege ona haforsa selesaun nasionál Timor iha jogu internasionál.

Haree estatístika jogu, ekipa rua mós laduun dook malu. Aitana FC, oras ne’e ukun Grupu A ho pontu 10 hafoin hakat-liu jogu 4—manán tolu no impata ida. Ekipa ne’ebé oras ne’e defende hosi mellór markadór provizóriu, Nélson Freitas ne’e,  prodúz ona golu 13, maibe foin hetan sofre golu 2.

Jogadór Aitana FC, klaru iha ambisaun boot atu hakat hikas fali ba Primeira Divizaun no hetan pontu ida de’it mós bele lori ekipa refere hetan ona billete ba Primeira Divizaun.

Enkuantu, Armada Ventura ne’ebé koñesidu ho koletividade ekipa sei la husik mamar de’it no sei hatudu mós jogu ne’ebé furak satán hetan reforsa hosi jogadór estranjeiru ne’ebé fó influensia maka’as ba ekipa refere. Sé maka sei kampiaun? Husu ba minutu 90.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here