Koordenador Operasaun Konjunta Alfándega Timor-Leste, Dionisio da Costa Pereira, ho ekipa hatun no konta hela sigarru ilegál ne’ebé sira prende, iha edifisiu Alfándega Portu Dili, Kuarta (19/06/2019). Imajen/Eugénio Pereira

DILI, 19 juñu 2019 (TATOLI)-Liuhosi operasaun Diresaun Intelijénsia no Anti-Fraude Alfándega Timor-Leste, prende sigarru ilegál slop 682 ne’ebé fó prezuiju ba Estadu Timor-Leste lakon osan $32,000

Ekipa Alfándega Timor-Leste, hatun hela sigarru ilegál ne’ebé sira prende,Kuarta (19/6/2019). Imajen/Eugénio Pereira

Sigarru ilegál negosiante ambulante balun hatama hosi fronteira Indonézia mai Timor-Leste. Bainhira ekipa halo operasaun iha estrada área Delta-Elemloi, Comoro Dili, ohin, deteta sigarru sira ne’e negosiante balun atu ba fa’an iha loja no kiós sira iha área Delta nian. Bainhira ekipa halo operasaun tenta kaer na’in ba sigarru halai lakon no ekipa tenta atu duni tuir la hetan tanba engarrafamentu.

Totál sigarru ne’ebé prende hamutuk slop 682 ne’ebé konta ba totál sigarru lolon (stick) 17,160  kompostu hosi Surya 12 Gudang Garam slop 642  konta ba sigarru lolon 6.240, DJI SAM SOE 17 ball konta ba sigarru lolon 2.720, Marlboro Gold Lights Mutin Slop 21 konta ba sigarru lolon 4200, Marlboro Mean Slop 20 ho totál lolon 4000.

“Sigarru sticker ilegál hosi Indonézia sira ne’e ita prende iha área Delta Elemloi, Dili, ohin, maibé na’in ba sigarru halai husik hela sigarru ne’e ita foti mak sigarru hanesan evidénsia. Sigarru ilegál ne’e ita konta hamutuk slop 682 ne’ebé fó prezuiju ba ita nia Estadu Timor-Leste kuaze lakon osan kuaze $32.000,” hateten Koordenadór Operasaun Konjunta Alfándega Timor-Leste, Dionisio da Costa Pereira ba jornalista iha Alfándega Portu Dili.

Nia dehan, mezmu na’in ba sigarru ilegál ne’e halai, maibé parte Alfándega sei buka tuir autór hodi responsabiliza ba atividade negósiu ilegál ne’e.

Alfándega apela ba negosiante sira atu labele kontinua fa’an sigarru ilegál, tanba ekipa sei kontinua halo nafatin operasaun. Entretantu, sigarru ne’ebé prende lori kedas ba Polisia Nasionál Investigasaun Kriminál (PNSIK).

Jornalista      : Eugénio Pereira  

Editór             : Francisco Simões

HAKEREK NO HATÁN

Please enter your comment!
Please enter your name here