Reprezentante AFC, FFTL no klube sira hasai foto hamutuk. Imajen Mídia LFA

DILI, 19 juñu 2019 (TATOLI)Asian Football Confederation (AFC), ohin iha Dili, hamutuk ho Federação Futebol de Timor-Leste (FFTL), hala’o semináriu ho klube sira ne’ebé hamahon-án iha Liga Futeból Amadora (LFA) hodi ko’alia kona-ba pilár importante ualu (8) ne’ebé iha regulamentu AFC.

Pilár ualu ne’e mak hanesan, AFC Club Licensing Requirements/AFC Cup CLR, Financial Management, Financial Goals & Objectives, Funancial Budgeting, Bookkkeeping & preparation of financial statements, Finance department & functions and Basic Financial Auditing.

Hosi sorumutu refere bele aumenta no hasa’e di’ak liu-tan kapasidade no koñesimentu klube, nune’e bele jere finansiamentu sira ho di’ak.

Klube hirak ne’ebé ohin loron partisipa iha semináriu refere mak klube Primeira Divizaun hanesan Boavista de Timor, AD. SLB Laulara, Lalenok FC, Karketu Dili FC, Assalam, AS Ponta Leste. Enkuantu, Segundu Divizaun mak hanesan Porto Taibessi, Cacusan, Lika-Lika, Fitun Estudante Lorosa’e (FIEL), Kablaki FC, DIT FC, Sporting de Timor no FC Lero.

 Reprezentante AFC, Samuel G Panthradil hanesan Finance Consultan hateten, nia prezensa iha Timor-Leste atu hato’o no esplika kle’an liu-tan kona ba regulamentu AFC nian ba klube hotu.

“Ha’u hakarak klube hotu iha Timor -Leste bele iha koñesimentu kle’an liu-tan kona-ba regulamentu AFC nian, nune’e bele padroniza klube hotu-hotu nia situasaun para bele partisipa iha kualkér kompetisaun liliu parte sira kompetisaun AFC, klube hotu bele kompriende ona kona-ba regulamentu, kritéria regulamentu AFC nian, ko’alia mós kona ba finansa klube sira. Ne’e mak ohin iha mós ekipa ida kona-ba halo auditória ba finansiamentu klube sira nian atu halo esplikasaun ba klube sira,” tenik Samuel.

Nia dehan, ekipa auditória nia serbisu oinsá bele halo audit ba klube sira-nia orsamentu ne’ebé gasta tuir duni padraun AFC nian ka lae.

“Klube sira la’ós mai atu hatudu de’it sira-nia montante kona-ba valór osan iha banku maibé kontrola mós kona-ba osan hirak ne’e sira gasta ba klube tuir regulamentu AFC nian duni ka laiha,” nia esplika.

Iha fatin hanesan, Sekretáriu Jerál FFTL, Nélio Isaac Sarmento husu ba klube hotu atu aproveita oportunidade ne’ebé AFC fó ho di’ak nune’e ba futuru bele jere di’ak liu-tan finansiamentu klube.

“Ita atu hakat ba nível internasionál, presiza hadi’a di’ak uluk sistema sira iha ita nia uma laran. Ne’e duni, ohin oportunidade di’ak tebes tanba reprezentante AFC nian mak mai ko’alia diretamente ho ita,” tenik Nélio Isaac, ohin.

 Entretantu, tuir ajenda ne’ebé iha, semináriu  refere sei halo durante loron rua (19-20 juñu 2019).

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here