Formatu dijitalizasaun TV

DILI, 18 juñu 2019 (TATOLI)—Koordenadór Jerál Apoia Téknika RTTL. Ep, Abrão Soares, hateten teknolojia dijitalizasaun iha vantajen hanesan prosesu mudansa tipu informasaun hanesan letra, liafuan, dezeñu, lian no data.

“Dijitál nia esesu mak ne’e, bainhira dulas antena buka nia chanel mak moos ona, ita asiste hanesan parabola. Maibé dulas mak la hetan, la hetan ona,” Abrão Soares, ba Agência Tatoli iha edifísiu RTTL, Caicoli, Dili, ohin.

Iha prátika, Abrão informa, dijitalizasaun hanesan solusaun hodi rezolve limitasaun no inkonsisténsia iha divuzaun analog. Prosesu teknolojia ne’e hala’o hodi hetan efisiénsia iha buat barak, inklui tekonolojia divuzaun.

Nia dehan, teknolojia divuzaun ho dijitalizasaun hatudu dezeñu ne’ebé moos no lian ne’ebé di’ak tebes.

“Mundu modernu agora, dijitalizasaun ne’e la’ós buat foun ona. Iha tinan 2009, sira (Indonézia) implementa tiha ona, maibé to’o agora provínsia ida ka rua mak implementa. Sira-nia regra ka regulamentu atu uza sistema dijitalizasaun atu uza iha ne’ebé barak liu iha Ázia uza Europa nian,” tékniku ne’e haktuir.

Nia fó ezemplu, númeru 01, la hanesan analog, dulas ba dulas mai, hakilar malu dehan dulas tan, maibé kuandu dijitál ona, númeru 01 mak ne’e ona, bele asesu ona.

Koordenadór Jerál  ApoiaTéknika ne’e, haklaken kooperasaun ne’e  hala’o iha VI Governu no iha VII governu atu implementa, maibé tanba kestaun seguransa entaun adia mai fali iha VIII Governu foin halo lansamentu iha loron tersa (18/7/2019). Projetu ne’e rasik sei finaliza iha fulan dezembru 2020.

“Fulan-juñu nia laran, sira mai atu instala ona, maibé kondisaun iha RTTL mak seidauk di’ak. Maibé, uma atu halo dijitalizasaun ne’e mós halo ona, torre ba dijitalizasaun ne’e iha tiha ona. Torre ida iha foho Kutulau, Liquiçá no iha Dili,” Abrão esklarese.

Nia hatutan, iha Dili hahú halo ona reabilitasaun iha edifísiu RTTL nia kotuk no ida iha foho Kutulau, postu administrativu Bazartete, Munisípiu Liquiçá. Tuir nia, ekipamentu dijitalizasaun hosi Xina sei mai Timor-Leste iha loron 15 jullu, tinan ne’e.

“Ita foin adapta sistema dijitalizasaun. Ita mós rekoñese ita-nia kapasidade. Sira (Xina) promete tiha ona katak bainhira instala, sei involve tékniku timoroan sira hodi apriende depois ba tuir formasaun iha Xina. Buat ne’e foun. Ita mós sei prepara ita-nia rekursu hodi simu buat foun ida ne’e,” nia akresenta.

“Dijitalizasaun ne’e ba torre ne’e de’it. Parte estúdiu produsaun RTTL nian  sei analog. Agora Xina ajuda mak torre (pemancar-termu Indonézia) de’it. Aban bainrua ita hanesan RCTI, SCTV, liliu Dili ho Liquiçá atu uza dijitál ne’e, sei oferese set top box hamutuk rihun 30. Sira (Xina) sei fahe ba komunidade sira atu asesu no futuru sei iha kanál hamutuk 22. Konforme ita hakarak hili ida ne’ebé,” Abrão salienta.

Nia dehan, la’ós Dili ho Liquiçá de’it mak asesu, maibé Aileu, Ermera, Atabae bele aesu, tanba besik torre ne’ebé instala ba.

“Projetu dijitalizasaun iha Dili reabilita ona. Parese finaliza iha juñu ka jullu ka se lae agustu nia laran. Depois iha Fatuahi mós reabilita ona. Iha foho Kutulau torre ho uma mós harii dadaun ona. Agustu hanesan ne’e bele instala ona,” Koordenadór Apoia Téknika ne’e hateten.

Governu Timor-Leste ho Repúblika Populár Xina, hala’o kooperasaun kona-ba programa dijitalizasaun ne’e iha tinan 2016, VI Governu Konstitusionál nia tempu.

Desizaun ne’e governu foti hanesan esforsu ida hodi halais dijitalizasaun iha indústria televizaun nian, tanba nasaun barak iha mundu sei halo migrasaun ba dijitalizasaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here